ORANJESTAD (AAN): Siman a habri, y riba Dialuna mes Banco Central di Aruba (BCA) a publica su “Economic Outlook” di mas recien.
E publicacion aki ta contene proyeccionnan economico riba termino corto (2026-2027) y termino medio (2028-2030).
Segun e analisis, economia di Aruba a crece cu 6,3% den 2025, y ta proyecta di modera na 3,7% den 2026 y 2,3% den 2027. Den 2026, consumo di hogar, sosteni pa stimulo fiscal y crecemento den empleo, probablemente lo sostene crecemento economico. Sinembargo, e mercado di trabao preta ta sugeri cu empresanan por depende mas y mas riba labor importa.
Turismo tambe lo contribui na crecemento economico, empuha pa un aumento premira den bishitante. Den 2027, un crecemento mas lento premira den consumo di hogar y turismo lo pisa mas cu un aumento den inversion, resultando den un desaceleracion di crecemento economico.
Inflacion probablemente lo acelera for di 0,1% den 2025 pa 2,4% den 2026. E aceleracion aki ta resulta di e tensionnan geopolitico den Medio Oriente, cu lo hisa prijs internacional di petroleo.
Consecuentemente, costo di combustible y transporte ta subi, contribuyendo na prijs di gasolin mas halto. Ademas, importacion ta bira mas caro, agregando mas presion inflacionario. Segun cu prijs di petroleo lo baha bek gradualmente, inflacion lo reduci y yega 1,4% den 2027, aunke prijs di cuminda y productonan no relata na energia lo sigui empuha inflacion.
Mirando e incertidumbre den mercado di energia, e “Economic Outlook” aki tambe ta considera un scenario desfaborabel di prijs halto di petroleo te fin di 2027. Den e scenario aki, e impacto economico ta limita den 2026, pero ta bira mas pronuncia den 2027, cu crecemento di Producto Domestico Bruto (GDP) real bahando pa 0,4% y inflacion subiendo pa 4,9%. Prijsnan mas halto ta reduci e poder di compra di hogarnan y ta mengua actividad economico.
Pa e termino medio, BCA ta proyecta cu crecemento lo modera gradualmente, yegando 2,1% den 2028, 1,7% den 2029, y 1,0% den 2030. Sinembargo, e proyeccion ta keda suheto na riesgonan importante, incluyendo desaroyo den demanda turistico, prijs di energia, disponibilidad di labor, implementacion di inversion, politica fiscal, y condicionnan economico y geopolitico global.
E publicacion completo ta disponibel na www.cbaaruba.org cu ta e website di Banco Central di Aruba.
