Grupo di asociacion di Agencianan di Viahe di Colombia ta bishitando Aruba

ORANJESTAD (AAN): Siman a habri, y Oficina di Turismo di Aruba (A.T.A.) ta yama bonbini na un grupo di 19 mayorista of asina yama ‘wholesalers’ di ANATO.

   ANATO ta e asociacion Colombiano di agentenan di biahe y turismo cu ta na Aruba bou di guia di Carlos San Martin, presidente di ANATO, conhuntamente cu e conseho di supervisor di ANATO Capitulo Mayorista. Durante e bonbini por a conta cu presencia di Ronella Croes CEO A.T.A., y Jordan Schlipken Area Director di A.T.A. Latino America hunto cu Claudia Delgado, Sales Multi-liner Colombia kende a compaña e grupo pa e bishita na Aruba.

   E grupo di bishitante ta conta cu wholesalers cu ta procedente di diferente parti di Colombia, entre otro for di Bogota, Cali, Medellin y Cartagena. E meta di nan bishita ta pa nan siña mas tocante e destinacion. Durante nan estadia, nan lo experencia nos isla feliz di un manera personal y directo, y alavez nan lo reuni cu 21 diferente hotel y operador turistico riba nos isla.

   E gran mayoria di e wholesalers cu ta di bishita na nos isla, no ta bendiendo Aruba na e mercado Colombiano actualmente. Pa e motibo aki e bishita aki ta di sumo importancia. Durante nan estadia, nan lo bishita diferentelugar y atraccion pa haya un bista completo di tur loke Aruba tin di ofrece.  Ademas lo tin varios presentacion informativo y educativo cu ta enfoca riba segmentonan specifico.

   Entre otro, Aruba Convention Bureau ta brinda informacion valioso tocante ‘MICE’, caminda cu ta enfoca riba e segmento di industria di turismo y evento cu ta inclui conferencia, reunion y exhibicion. Tambe ta combersa tocante e mercadonan ‘niche’ y hiba un dialogo interesante cu A.T.A. tocante oportunidadnan cu lo yuda facilita e trabao di e mayoristanan den nan mercado.

   E bishita aki ta sigura cu e mayoristanan Colombiano tin e conocemento valioso y necesario pa promove nos isla, asina aumentando benta y e cantidad di bishitante for di Colombia.

   Tocante e mercado Latino Americano: Tur cos ta mustra cu aña 2023 lo ta un aña fuerte pa loke ta trata e mercado di Latino America. A.T.A. ta premira cu e cifranan di bishitantenan stayover lo sobrepasa e nivelnan prome cu pandemia. A.T.A. su meta pa Latino America ta pa yega na un recuperacion di 103% compara cu 2019, pues un crecemento di 3%.

   Te cu na augustus 2023, Aruba a ricibi 78,183 bishitante stayover for di Latino America, cual ta 22% mas cu 2019. Colombia ta e mercado primario pa Latino America y te cu augustus a crece cu 36% compara cu 2019. Factornan cu a contribui na e cifra aki ta entre otro introduccion di buelonan adicional pa Medellin y lansamento di rutanan nobo manera Cali.