Grupo di alumnonan di Maria College a bay mira e obra ‘Memoria Ancestral’

ORANJESTAD (AAN): Manera ta conoci, e artistanan di arte, Laysmina Emerencia, Natusha Croes,

y Darwin Winklaar a crea e obra di teatro ‘Memoria Ancestral’, cu ta trata e topiconan interesante di racismo y bullying cu cada un a pasa aden, sin lubida cu a pasa igual cu hopi di nos antepasadonan cu a forma parti di sclavitud riba e isla mas cu 160 aña pasa.

   E obra unico aki ta bon presenta y actua, y ta transmiti su mensahe na un forma cla y raspa, y esaki ta ideal pa hubentud di awendia por sinta, mira, y compronde esaki y absorba e impresion y sentimento cu e ta laga atras.

   Pesey mes, recien un grupo di alumno di Maria College MAVO na Playa, di e profiel ‘Humaniora’, a acudi na Cas di Cultura pa presencia e obra aki.

   Den e vak di Historia di Arte y Cultura, e alumnonan di e scol ta siña aprecia arte, y cu e obra teatral aki cu nan mesun wowo, nan ta haya sa mas di Aruba su historia y cultura.