Grupo di 170 empleado di SABA a ricibi certificacion den Prome Auxilio

ORANJESTAD (AAN): Den e periodo di Augustus te cu November di e aña aki, un grupo di 170 empleado di SABA a keda certifica den Prome Auxilio (BLS, Basic Life Support).

A logra esaki den colaboracion cu Aruba Medical Assistance (AMA), cu ta duna e curso conforme e standardnan internacional di Health & Safety Institute (HSI).

   Cu e certificacion aki, e empleadonan ta miho prepara pa reacciona den momentonan di urgencia, no solamente pa clientenan na SABA, pero tambe na cas cu famia y den situacionnan di urgencia den nos comunidad.

   Pa 2026, SABA su ambicion ta pa logra cu tur empleado di SABA (alrededor di 270) tin un certificado di BLS y asina sigui fortifica e organizacion.

   SABA ta gradici tur empleado cu a dedica nan tempo y tambe pa nan compromiso pa logra e bunita resultado aki.

   Cu e iniciativa aki, SABA ta sigui inverti den un cuido mas sigur, responsabel y asina honrando su lema di ‘Hunto mas Fuerte’.