Tormenta di sneeuw riba Diabierna
- Tres vuelo di regreso si a keda cancela
ORANJESTAD (AAN): Un tormenta intenso di sneeuw cu a cuminza impacta desde oranan trempan di Diabierna (26 di December 2025) na e ciudad di New York y gran parti di Noordoost di Merca, a ocasiona un monton di cancelacion di vuelo di e.o. New York, Boston, y tambe Newark.
Sinembargo pa puro suerte, ningun di e vuelonan aki cu tabata cla pa sali rumbo pa Aruba for di e ciudadnan aki no a wordo afecta. Tur vuelo di JFK Airport di New York, Logan Airport na Boston, y Newark Liberty Airport na New Jersey a sigui normal pa Aruba. Pero otro islanan den Caribe no tabatin asina hopi suerte.
Mayoria di e cancelacionnan na den e area Noordoost di Merca tabata cu e aerolinea jetBlue. Hopi vuelo di e region aki rumbo pa Republica Dominicana a wordo cancela.
E situacion di cancelacion aki a genera un congestion enorme pa aerolineanan cu mester a sali pa otro destinacionnan (cu no ta Aruba). Decenas di pasahero a keda stagna na Aeropuerto di New York, sin sa si acaso nan vuelo lo sigui, of lo pasa pa otro dia.
Te cu Diabierna atardi, DIARIO a tuma nota cu ningun vuelo di e region aki pa Aruba a wordo cancela. Un vuelo di WestJet procedente di Toronto (Canada) a pasa den un retrazo di como 60 minuut, pero a yega Aruba den oranan di atardi.
Na Merca, mas di 60 miyon habitante ta aworaki bao alerta meteorologico di winter riba Diabierna 26 di December. E tormenta fuerte di sneeuw a cubri zonanan amplio di Noordoost, ocasionando problema y dolor di cabez pa trafico di auto y truck, infrastructura, y servicionan esencial, specialmente den arenana urbano hopi pobla. Riba diabierna, algun area lo haya como 20 cm di capa di sneeuw.
Tres vuelo di regreso cancela: Aunke e avionnan a yega for di New York y tambe for di Newark sin problema, e compania jetBlue a opta pa no regresa bek Merca. En total 3 vuelo a wordo cancela na Aruba, pues pasaheronan di jetBlue cu mester a regresa Newark cu vuelo B6-2420 pa 2:00 pm a keda na tera na Aruba. E vuelo di jetBlue pa New York pa 4:40 pm cu vuelo B6-558 tambe a keda cancela. E otro vuelo di jetBlue pa New York pa 5:59 pm cu ta vuelo B6-158 a keda cancela. Pero e vuelo di jetBlue pa Boston pa 5:59 pm si a sigui normal.
