Grupo di 16 profesional entusiasma y motiva cu nan rol di Supervisor di Codigo

ORANJESTAD (AAN): Departamento di Mucha y Hoben (DMH) a sigui cu otro accion concreto relaciona cu e trabounan riba e area educativo y informativo di Codigo di Proteccion.

E training aki ta consisti di 6 mitar dia na JFK y ta ofreci na diferente profesional den e 4 sectornan; social, salubridad, husticia y enseñansa.

            A inicia dia 1 di november y diabierna 10 di november, e grupo a finalisa unda a conta cu presencia di Minister President pa entrega di e certificado, cu tabata un grupo di profesional dedica y motiva pa ehecuta nan rol di Supervisor di Codigo.

            E grupo cu a finalisa nan curso di Supervisor di Codigo ta: Maritza Ordoñez di sector salubridad – Rafael Perez y Patricia Portier di sector deporte – James Sneek – Geraldine Maduro – Yuneida Albus – Harold Ras – Iris Ras – Ilsiah Koolman – Franchesca Heinze – Joase-Ann van der Biest – Valerie Willer – Deanna Lampkin – Jennifer Margaretha – Byanca Alvarado – Felisha Ponson di sector social.

            E rol di Supervisor di Codigo ta encera cu e profesionalnan aki den nan organisacion, lo bira e persona asigna pa ta e experto riba e tereno di (sospecho di) abuso di mucha. E coleganan profesional den e organisacion, por acerca den confiansa, pa asina por haya sosten y/of ayudo den forma di conseho y/of guia. Di e forma aki cada profesional por sigui atende cu un caso of situacion di posibel (sospecho di) abuso di mucha.

            Un di e metanan di DMH ta pa empodera nos profesionalnan cu conocemento y habilidad concreto y diferente, pa asina por ehecuta e decreto nacional Codigo di Proteccion. Sin laga afor e enfoke principal riba e aspecto preventivo y pa tin mas siguridad y proteccion pa nos mucha- y hobennan na Aruba.

            DMH kier gradici tambe Trainer Jermin Bell cu tuma e encargo pa coordina e 6 dianan aki, como tambe e otro coleganan Trainer di Codigo cu a forma parti di e 6 dianan aki, haciendo esaki cu hopi dedicacion y motivacion.

            Actualmente Aruba ta conta cu 43 Supervisor di Codigo den e 4 sectornan; husticia, social, enseñansa y social, cu ta trahando riba e maneho diario di nan rol como Supervisor di Codigo pa ehecuta, monitoria y guia den diferente organisacion, cu traha directo y/of no directo cu mucha y hoben.

Den 2024 DMH lo ranca sali cu sesion di brainstorm pa duna contenido y structura di e plataforma di Supervisor di Codigo, pa di e forma aki sigui stimula, apoya y promove un trahamento hunto, caminda mas profesional tin un aporte concreto pa yuda sostene nos mucha-, mayor- y profesionalnan, pa finalmente por yega na un convivencia mas harmonioso, trankil y primordialmente sigur pa nos mucha- y hobennan.