Compania di coriente di St. Maarten a bin tira bista con NV Elmar ta operando

E isla tin dificultad cu coriente...

ORANJESTAD (AAN): Un delegacion di e compania di utilidad NV GEBE procedente di St. Maarten, a haci bishita na instalacion di NV Elmar na Aruba.

   NV Elmar a considera esaki como un bishita special di e compania di Isla Ariba. E bishita aki a encera un intercambio balioso di insights y updates tocante varios proyecto andando na NV Elmar.

   Nan a bin check e proyecto di e compania na Aruba pa crea un ‘Smart Grid’ y tambe e proceso pa instala tur cas cu Smart Meter.

   DIARIO a compronde, cu nan a discuti ampliamente riba e potencial- y retonan di energia solar. E ta conoci cu diferente hermana islanan ta enfrentando reto relaciona cu generacion y consecuentemente distribucion di coriente.   Na varios ocasion DIARIO a publica riba e dolor di cabes cu nan ta pasando aden na St. Maarten.

   Pesey pa NV Elmar, a ta importante pa forma aliansanan pa nan por comparti e conocemento y sostene nan den nan esfuerso pa sigui dilanti.

   Un otro topico importante tabata nos proyecto di EV ChargeUp den cual NV Elmar ta forma parti di e EV Pathway di Caribe. Ademas di e presentacion di NV Elmar, e delegacion di NV GEBE a ricibi un tour di nan Substation na Sabana Blanco.  E compania di Aruba tabata satisfecho pa ricibi feedback positivo for di e delegacion tocante e nivel di e infrastructura y tecnologia den nan Substation aki.

   E bishita di NV GEBE a mustra e interes di e profesionalnan di St. Maarten pa ta na altura di e desaroyonan den e operacion di NV Elmar.   Sigur e compania local di electricidad ta satisfecho cu e bishita balioso di NV GEBE y nan ta spera di por colabora hunto den futuro cercano.