Stichting Musica a haci anuncio
ORANJESTAD (AAN): Basa riba e criteria di Banda di Aña (‘Band of the Year’) cu Stichting Musica ta mantene, un cuerpo di hurado distribui riba e rutanan di Carnaval a evalua cua ta e banda cu a contribui mas durante Carnaval 71.
E criteria tabata lo siguiente: E banda mester a participa na “Aruba Caiso & Soca Monarch su Soca Finals 2025” y/of den “Festival di Tumba 2025”. E banda mester a participa entre e siguiente paradanan di Aruba su Carnaval 2025: Parada di Luz na San Nicolas, Lighting Parade Oranjestad, Parada di Jouvert Morning, Parada Grandi di San Nicolas, y Grand Parade Oranjestad.
Tambe a usa e criteria di e banda cu miho animacion den parada nan, e banda su zonido, presentacion di e banda su trailer den e paradanan. Tambe e banda mester toca e Soca ganador di Aruba Caiso & Soca Monarch, eta “1 For Unity” of e Tumba ganador 2025 “Ban Cumi”.
Dialuna atardi, Stichting Musica a anuncia cu e Banda di Aña a bira ‘Groove Masters’.
Sin duda alguno, Groove Masters a destaca durante di e evaluacion di hurado y como Band of the Year ta gana e suma di 5.000 Florin como premio. Groove Masters a destaca cu un bon calidad di sonido, tremendo animacion cu un repertorio di cancion nobo y clasico y cu un presentacion cu a impresiona comunidad en general.
E premio pa Band of the Year lo worde entrega durante e Prize Award Event di Stichting Musica. Un pabien ta bay di parti Stichting Musica pa tur banda musical cu a participa na Aruba Caiso & Soca Monarch su Soca Finals 2025 y tambe na e paradanan di Carnaval 71.
