Gran cantante Boysy Croes a fayece cu 92 aña di edad

Legendario musico di Aruba

• E tabata bibando ultimo 10 aña na Merca 

ORANJESTAD (AAN): Den decada di 1970 e tabata conoci pa su famoso ‘Carniceria Aruba’ cu tabata na e cruzada di Nieuwstraat cu Kruisweg.  E tabata haya su clientenan vast cu tabata admir’e pa su forma di selecciona carni, y di trata clientenan.

   Ta trata aki di Boysy Jacobo Federico Croes.  Aunke su nomber oficial ta Boysy, toch hopi hende tabata skirbi ‘Boysie’ ora ta referi na dje.  Pero pa su famia y amigonan cercano, semper ta usa ‘Boysy’ ora di skirbi di dje.  El a nace na Aruba dia 10 di October 1931, y riba Diasabra su famianan a informa cu el a fayece den su soño.

   Ultimo diez añanan, Boysy a bay biba cu su famia na Merca.

   Sin duda alguno, Boysy tabata conoci tambe mas bien como e legendario musico stima di pueblo, cu tabatin su mesun grupo musical yama ‘Conhunto Crioyo’ pa entretene fiestanan, y ademas a compone numeroso cancion di dje mes, cu a bira hit.

   Su forma chistoso di adapta cancionnan, a pone cu Boysy a keda popular y tabata graba cancionnan cu ta sigui resona tur caminda.  E toque chistoso tabata haci nan bira faborito den pueblo.

   Despues ata Boysy a bay na nivel aun mas halto, y participa den Calypso y Roadmarch Contest tambe.  Su meta ta pa djis engrandece cultura, incluyendo celebracion di Carnaval.

   No ta djis na Aruba su cancionnan a pega, pero tambe na otro islanan den Caribe.  DIARIO den pasado a yega di raporta con hasta na Hulanda, e tin tantisimo fanatico di su cancionnan.  Sea bo ta haye ta toca cuarta, of na su organ synthesizer, e sa anima fiestanan unda e so ta toca, y publico ta goza di comienso te fin.

   Na famianan di Boysy Jacobo Federico Croes, DIARIO ta expresa su mas profundo palabranan di condolencia.