Nathaly Tromp, Trahado Social CFCA:
*Mayoria ta keda cerca nan famia di crianza
ORANJESTAD (AAN): Trahado Social di Centro Famia di Crianza Arubano, Nathaly Tromp, tin 16 aña ta brinda servicio na e institucion aki.
Den entrevista cu DIARIO, el a elabora tocante e di 20 aniversario di CFCA, y a cuminza pa expresa cu e ta contento cu den e transcurso di e 20 añanan aki, nan ta bezig pa haya famia di crianza, pero mester atrae mas famianan pa asina cubri e necesidad di ta den un famia cu diferente mucha tin.
“Mi tin cu bisa cu desde Covid, e parti di haya famia di crianza a bira un tiki mas dificil unda cu antes tabata tin dificultad pa haya famia di crianza pa muchanan entre 8 cu 9 aña, y aworaki e edad a baha te cu 5-6 aña”, Nathaly Tromp a indica.
El a gradici e presencia di Diario den e Centro, p’a asina difundi e informacion aki den comunidad y yuda nan haci mas facil pa haya famia di crianza.
Tromp a menciona cu pa aña nan ta busca di diez pa diesdos famia pa muchanan entre 0 pa 18 aña. El a splica cu e rol di un famia di crianza ta brinda ayudo temporal, cuido na mucha cu no por ta den e seno di su propio famia, mientras cu e mayornan ta haya ayudo di e instancianan concerni pa nan situacion drecha.
“Entre tanto e famianan di crianza ta brinda e muchanan stabilidad, seguridad, atencion, amor, y tur locual e mucha mester cu un internado no por ofrec’e”, Nathaly Tromp a comenta. El a agrega cu ta algo hopi natural cu un mucha y un famia di crianza ta pega na otro.
“Un famia di crianza ta wordo prepara y guia for di un principio cu e chens tey cu dia di mañan e mucha lo regresa na su mayor bek; esaki nos no tin e den nos man, pero nos ta bisa e famia di crianza cu nos ta informa nan di cada stap cu ta pasa”, señora Tromp a indica.
E mucha tambe CFCA ta tene cuenta cu su emocionnan. Nan no ta yega pon’e den un famia di crianza, esaki ta un proceso cu ta bay poco, poco, pa e famia ta bay na internado, conoce e mucha, y asina aki cuminza crea un conexion cu e mucha, prome cu e ta cuminza pasa dia y asina aki cada bez ta keda hisa e cantidad di tempo cu e famia ta pasa cu e mucha.
Nathaly Tromp a menciona cu di 10 mucha tres ta bay na nan mayornan bek, honestamente bisa. Mayoria di mucha ta keda den nan famia di crianza.
