E pueblonan indigena di America
*Linguista Ramon Todd Dandaré a splica
ORANJESTAD (AAN): Diasabra atardi, na Biblioteca Nacional, durante un charla relaciona cu Dia Internacional di e Pueblonan Indigena, Ramon Todd Dandaré, Mag. Ling, a duna di conoce cu e pueblonan indigena di e continente Americano ta ampliamente reconoci como e gruponan y nan descendientenan cu tabata habita e region aki prome cu yegada di e colonisadonan y colonistanan Europeo (esta, precolombino).
E pueblonan indigena cu ta mantene, of ta busca manera di mantene, e formanan di bida tradicional ta biba for di den Artico Noord aya te na e extremidadnan zuid den Archipielago di Tierra del Fuego.
E impacto di colonisacion Europeo riba e continente Americano den e comunidadnan indigena tabata (y ainda ta) en general bastante fuerte, y hopi autoridad ta calcula cu e gradonan di disminucion significativo di e poblacion ta debi principalmente na malesa, pero tambe na violencia. E alcance di e impacto ey ta obheto di debate continuo.
Varios pueblo a keda extingui poco despues, of casi extingui. Tur e nacionnan di Norte, Centro y Sur America tin poblacion di pueblo indigena denter di nan teritorionan.
Na algun pais (particularmente na Latino America) e pueblonan indigena ta forma un componente
importante di e poblacion nacional total: na Bolivia nan ta calcula cu e ta 56-70% di e total di e pais, y por lo menos mita di e poblacion di Guatemala y di e nacionnan Andino y Amazonico di Peru. Pa keda mas cerca di cas, e calculacion mas reciente di e cantidad di pueblo indigena na Colombia ta pon’e na 66, mas o menos 9,5% di e poblacion, esta 5 miyon persona mas o menos.
Pa Venezuela ta informa cu tin 51 pueblo indigena cu ta representa 3% di e poblacion, igual na
mas o menos 800 mil persona, Todd Dandaré a duna di conoce.
