ORANJESTAD (AAN) Den entrevista cu Matutino DIARIO, Minister Geoffrey Wever, Titular di Economia y Finanzas a relata cu ECLAC,
cu ta e Departamento Financiero pa America Latina y Caribe, a yuda Aruba pa implementa e Tecnologia Financiero (Fintech), cu ta un proyecto cu tin un aña y mey andando.
Diamars atardi, e representante di UN ECLAC a entrega e Minister e rapport presenta na Aruba, y lo comparti esaki cu un grupo di personanan den e sector, y e proximo paso ta hinca esaki den e Landspakket cu tin cu Hulanda, y Hulanda lo yuda Aruba cu e implementacion di e plan aki.
“Pues, apesar cu e plan no tabata cla, ya Hulanda tabata sa cu nos ta preparando esaki, y ora e ta cla nan ta cla pa yuda nos cu implementacion, kizas cu trahamento di legislacion, manda experto, financiamento”, e mandatario a splica.
E mandatario a menciona cu ayera merdia e lo a tende kico tur ta e posibilidadnan finaciero-tecnologico na Aruba, teniendo cuenta cu e aspectonan legal cu Aruba tin, su plataformanan di pago, su realidad financiero, e parti di toezicht di Banco Central, entre otro.
Por ehemplo, e mandatario a señala, nan ta papia di PayPal pero pa awor e no kier establece su mes na Aruba pa aworaki, door cu e mercado ta mucho chikito.
