Un desaroyo importante pa economia di Aruba ta muri den silencio
*E base di economia di Aruba por bira caso den Corte di Husticia?
*Paisnan ta legalmente responsabel pa mantencion Tratado di Clima
ORANJESTAD (AAN) — E avion den cual e turista ta wordo transporta pa Aruba, ta anuncia cu e vuelo ta yeganda na su fin. Pasaheronan ta wordo confronta cu uno di e motibonan mas importante cu nan ta abordo di e avion como turista, cu ta e beachnan di Aruba!
Pa un turista cu ta biaha pa Aruba, sin duda e anuncio cu e avion ta yegando Aruba, ta bira su experencia inolvidabel cu e bista cu e costa Sur di Aruba ta ofrece.
Na e momento sigur e no ta tene cuenta cu ningun ley cu mundo a pasa a base di e Tratado Internacional di Clima cu ta duna proteccion na mundo y na hende contra condicionnan desastroso di clima.
Na varios DIARIO a bati alarma pa e realidad cu mester tene na bista, cu tur cos na mundo ta bay bon te na e momento cu drama presenta su mes y hende haci uzo di leynan pa e defende su caso.
E tema di cambio di clima, a alcansa un punto mayor for di momento cu na 2021, mundo a firma un tratado na cual paisnan mester tene nan mes si nan no kier haya nan mes dilanti Huez pero tambe den problema financiero serio.
Dia 23 di Juli 2025, mundo a wordo recorda cu e tratado internacional ta existi y cu tin leynan cu ta defende hende contra maneho di gobiernonan cu mester tene nan mes na e resultadonan di e acuerdo di clima.
Na varios occasion DIARIO a splica con serio e magnitud di e leynan y kico por pasa contra persona y paisnan, cu no tene nan mes na ley cu mester proteha bida y salud di hende na forma directo contra clima.
Ora papia di e leynan aki, generalmente ta papia di accionnan di Gobiernonan di tur pais na mundo, cu ta proteha naturaleza contra clima.
Pero e defensa real di hende contra e cambio di clima cu ta bira cada rato mas peligroso pa hende, no ta bini dilanti den e magnitud necesario.
Aruba no ta unico den un actitud mundial tolerante enfrente medidanan serio cu mester wordo tuma y cu ta mishi cu bida diario di e ciudadano pero tambe cu economia directamente pa no papia mes di negoshinan, di institutonan, di pueblo mes cu te cu un decada pasa, ainda no tabata biba cu e necesidad di confronta problema legal si no cumpli cu e leynan cu directamente ta defende hende contra e desastre climatologico cu hende a desaroya den tur su sabiduria.
E peligernan grandi di cambio di clima pa hende, ta mishi directamente cu bida di hende y esaki tabata e motibo principal pa accion pa cambio di clima, cu ta exigi programanan extenso cu hende kier neglisha.
Dia 23 di Juli 2025, e momento importante a yega cu den e Corte Internacional na Den Haag, Hulanda, Huez a dicta sentencia den un caso importante relaciona cu clima.
Huez a bay mas leu cu bisa solamente na kico un pais mester tene su mes y a mustra cu hasta otro paisnan cu ta causa problema pa ciudadanonan di un pais riba tereno climatologico, tin deber di paga pa resultadonan di nan traspaso y e daño cu nan a causa.
Esaki ta e punto cu ta bira importante pa Aruba. E Tribunal Internacional no a tene su mes na leynan cu ta atende cu cuido di naturaleza pero directamente cu e derecho humano internacional na cual tur pais mester tene nan mes.
Mester evita proyectonan cu ta produci emision di gasnan peligroso. Pero tambe Juez a ordena cu mester tuma medida di adaptacion y evita tur peliger serio na hende di generacionnan actual te generacionnan di futuro y caminda ta necesario atende cu e recuperacion.
Aki porta ta habri pues, pa evita tur desaroya cu por produci problema di salud di hende relaciona cu cambio di clima.
Awor e pakete huridico di Aruba ta bini dilanti. Temanan importante awor mester haya contesta.
Con ta atende cu hopi peligro cu ainda ta presente den e convivencia di Aruba no solamente pa proteha naturaleza contra hende pero con ta proteha hende contra naturaleza.
Con ta planta leynan importante pa cuida salud di e ciudadano pero tambe di e turista den un clima cu ta produci ingredientenan peligroso a base di cambio di clima?
E decision di Tribunal Internacional ta habri un pagina nobo den cual directamente e bienestar di hende a ocupa e prome lugar den e cambio di clima.
Economia di Aruba ta haci cu tanto pa e ciudadanonan Arubano como pa e turistanan durante nan estadia, adaptacionnan mester wordo haci, hasta ariba tereno di construccion di vivienda y lugarnan publico, pa evita cu hende ta bira victima di e hecho cu a neglisha e acuerdo internacional di clima, cu oficialmente awor Tribunal Internacional a entrega como palabracion cu e sosten legal necesario pa wordo mantene na bienestar no solamente di Pueblo local pero tambe otro paisnan y asina di tur hende y di tur pais, cu e ta afecta.
Hurisprudencia ta sumamente importante den e forma cu tribunal ta yega na un sentencia. Den e caso e veredicto di Huez ta sostene advertencianan serio cu DIARIO a lansa den un mundo cu ta encamina mas y mas procesonan internacional pa yega na areglonan.
