Grado di ocupacion a cay cu 10% mas den September  

Compara cu 12 luna pasa...

• Tin di bati alarma pa Gobierno lanta fo’i soño
• Varios restaurant awor ta purba haya cliente local 

ORANJESTAD (AAN): Puntra tur Taxista e dianan aki, tambe trahadornan di Restaurant cu ta wordo manda cas cu extra off-days e simannan aki.  Restaurantnan bashi diripiente ta haya nan ta haci uzo di tactica den temporada di Pandemia di Covid-19, door di ofrece prijs di ‘Dollars to Florin’.

   Cu excepcion di par di Resort, hecho ta cu na Aruba e situacion di turismo no ta bayendo bon.  Statistica di luna di Augustus, a sigui empeora den September.

   Asociacion AHATA cu ta representa e Hotelnan na e isla, a confirma cu Ocupacion promedio a baha te 63% na September.  E ta 10% menos (pa ta preciso: 9,8 porciento) cu un aña pasa. Aunke cu September historicamente tin un dip y a logra mantene RevPAR, e cifra aki ta preocupante.

   E grado di ocupacion di 63% aki ta esun di mas abao pa Hotelnan desde Pandemia di 2020.

   Tur esaki ta mustra cu Turismo tin su retonan e aña aki, y e momento pa bati ‘bel di alarma’ kizas ya a pasa.  Tin di tene un encuentro na nivel nacional cu tur Stakeholder pa papia riba esaki.

    Un luna prome, esta na Augustus 2025, e grado di ocupacion tabata 74%. E proyeccionan di AHATA pa grado di ocupacion tambe a worde ahusta y ta mustra cu di dos mitar di aña e ocupacion lo ta mas abao di loke na comienzo a worde proyecta.

   Causa di tur esaki: Lo tin hopi factor envolvi, pero uno primordial ta e hecho cu e turistanan Mericano diripiente ta haya nan mes ta hala faha mara, como cu nan lo no por haci gasto aworaki pa tuma vakantie, mirando con prijs di tur cos a bira super mas caro, desde cu Gobierno na Washington a cambia.

   Turistanan Mericano a bin descubri con nan aseguro di cuido medico, awor ta birando tin biaha hasta double mas caro.  Hopi ta perdiendo trabao.  Y varios di nan hasta a cancela turismo na nan propio pais.

   E factornan aki claro semper ta wordo teni na cuenta cu ne ora cu ta planea bo medida pa busca recurso turistico di otro direccion di biento.  Ya desde luna pasa a tende con tin reclamo cu Gobierno tin persona encarga cu Turismo cu no tin ningun plan concreto pa domina e retonan aki.

   Aunke ta mirando hopi mas turista ta yega for di Latino America, pero te ainda no sa si acaso nan ta laga mes hopi placa atras cu e turista Mericano.

   Awor cu Washington a impone un cobranza extra di $250 riba e costo normal caba di visa pa turistanan di Brasil por bishita Walt Disney World, aki ta e momento oportuno pa Aruba por a probecha pa cuminza atrae turistanan aki cu ya lo ta cancelando nan viahenan pa Walt Disney World.  Corda cu na Orlando, e Walt Disney World awendia ta cobrabo casi $200 caba pa cada persona cu kier drenta 1 solo dia den Magic Kingdom.  Corda riba e costo pa un famia di 5 persona, incluyendo e extra costo di visa pa e cinco personanan aki viaha di Brasil pa Merca.

   Semper ta asina na Aruba, cu ora grado di ocupacion y tourism credits ta baha, e ta un señal serio pa e sector hotelero. Si esaki continua lo mira medidanan contra empleadonan cu lo mester cuminsa reduci oranan di trabao y consecuentemente economia di Aruba tambe lo sinti’e.

   Anto te ainda ningun reunion urgente, ni cumbre yama door di Gobierno, pa bin cu medidanan.  Hasta ta cuestiona cu ainda no a regula e sector di Vacation Rentals.  Of kizas ya e no ta prioridad pa Gobierno nobo aworaki na mando di Aruba.

   Hecho ta cu hopi trahador di Horeca e momento aki ta extremadamente preocupa con e situacion ta.  Momento a yega pa cuminza haci algo como cu keto bay e isla ta depende casi full di turismo.