Seraida Pemberton, director Reclassering:
- Nan ta carga un bagage di problema social
- Reclassering ta trahando cu otro instancianan
ORANJESTAD (AAN) Señora Seraida Pemberton-Leonard, Directora di Reclassering, a trece dilanti den entrevista cu Matutino DIARIO, cu hopi hoben ta envolvi, principalmente e ultimo temponan aki, den bringamento riba caya y banda di scolnan.
Esaki ta un problema cu ta surgiendo mas y mas, cu maltrato cu arma blanco, piedra, bat y otro obhetonan cu e hobennan ta uza pa defende nan mes of pa bay bringa cu ne, y esey ta bin dilanti, mas y mas, e ultimo aña.
“Pero loke nos ta wak ora e hobennan bin cerca nos, e hoben ta carga un bagage. Cu esaki mi kiermen cu e hoben tin hopi problema social. Eynan bo ta wak cu mester hopi mas atencion riba e area social pa yuda e hobennan. Tin hobennan cu tin problemanan psicologico, depresion, problema mental, y tur esaki ta biniendo mas y mas dilanti.
“Nos ta purba di manda nan na e instancianan necesario, pero bo ta wak cu e problemanan ta birando hopi mas grandi”, Pemberton-Leonard a señala.
Tin situacionnan manera famianan kibra, ‘peer presure’ social media cu ta influenciando e mentalidad di e hobennan, y si no adresa e problemanan ey, nan ta keda.
“Netamente, Reclassering ta sintando cu diferente organizacion; nos ta ocupa ta trahando samenwerkings protocolnan. Nos ta haci’e cu EPB, Respaldo, DAS, Stichting Hunto, dus tur e organizacionnan nos ta ocupa trahando un samenwerkings protocol pa nos por wak con pa traha miho”, señora Pemberton a subraya.
El a agrega cu loke ta pasa ta cu Reclassering ta e unico instancia cu ta traha den guia obligatorio, y tur e otronan ta boluntario. E problema social t’asina grandi cu e takel di Reclassering no t’asina grandi pero e tin hopi urgencia pasobra den tur caso e clientenan a pasa e limite caba.
