Gobierno y FCCA ta duna Caya Sint Maarten un aspecto nobo

ORANJESTAD (AAN): Village ta cambiando pocopoco su aspecto. Habitante Joselito Kock di Caya Sint Maarten na San Nicolas a

expresa su satisfaccion cu e cambionan positivo cu ta tumando luga den Village. Segun Kock, e mehoracionnan ta contribui na un bario mas agradabel y ta motiva mas hende pa cuida nan entorno.

Durante e Accion di Bario cu a tuma luga diahuebs ultimo, Prome Minister Mike Eman a bishita diferente cas unda e trabaonan di verfmento y renobacion ta tumando luga como parti di un esfuerso pa embeyece e comunidad y mehora calidad di bida di su habitantenan. Segun Eman, e proyecto ta forma parti di un vision mas amplio pa revitalisa nos barionan rond di Aruba, den cual Gobierno, Fundacion Cas pa Comunidad Arubano (FCCA) y e bario ta traha hunto pa crea un entorno mas agradable y bon cuida.

E Prome Minister a expresa su satisfaccion cu e progreso cu ya ta visibel den Village y cu e reaccion positivo di e habitantenan. “Awor nos ta mira resultado concreto. E Trabaonan di renobacion a cuminsa caba den Village, den Vuyst; e trabaonan ta avansando bon y pronto nan lo sigui den Bushiri tambe,” Eman a remarca durante e bishita. E trabaonan ta inclui verfmento di casnan, cambionan di bentana y porta, varios reparacion necesario y otro mehora cu ta contribui directamente na un miho calidad di bida p’e residentenan.

Segun Eman, no solamente e casnan ta haya un aspecto nobo, sino tambe e comunidad ta gana un impulso nobo. Durante e accion di bario, e entusiasmo di e comunidad tabata evidente. Hopi habitante a acerca pa saluda, brasa y comparti nan preocupacionnan y hasta ofrece sugerencia cu e Prome Minister. Diferente persona a expresa nan gratitud pa e atencion cu Gobierno ta brindando na e bario y pa e esfuersonan cu ta haci pa mehora e entorno.

Desaroyo ta cuminsa den comunidad

Segun Prome Minister Mike Eman, tin biaha hende ta puntra dicon un Prome Minister mester ta presente den bario, participando den e accionnan di limpiesa, bishitando proyecto di renobacion of apoyando e actividadnan comunitario. Pa Eman, e respuesta ta cla. Desaroyo nacional ta cuminsa den comunidadnan unda hende ta biba y traha cada dia. “Un bario limpi, cu casnan den bon estado y e comunidadnan activo no ta resultado di e decisionnan tuma solamente den oficina. Nan ta resultado di colaboracion entre Gobierno y su ciudadanonan,” el a splica.

E iniciativa nan manera “Accion di Bario” y “Baki den Bario” ta ehempelnan di e filosofia aki. E meta no ta solamente pa limpia y embeyece nos barionan, sino tambe pa fortalece e sentido di responsabilidad comparti entre Gobierno y comunidad.

E Prome Minister a enfatisa cu progreso no ta wordo logra door di Gobierno so. Segun Eman, e ta resultado di colaboracion entre nos ciudadanonan, varios organisacion, comercio y gobierno. “Si nos traha hunto, nos por logra cosnan grandi pa Aruba. Ora un bario ta limpi, un cas ta wordo renoba of un bisiña ta yuda otro, nos ta fortalece Aruba. Cambio berdadero ta cuminsa den nos comunidadnan y den e compromiso cu cada uno di nos tin pa cuida nos isla.” Eman a invita tur ciudadano pa sigui participa activamente den e esfuerso pa mehora Aruba.

Diasabra awor 13 di juni for di mainta trempan un biaha un team di boluntario hunto cu Prome Minister Mike Eman lo ta presente den cayanan di San Nicolas ta verf cas. Di e manera aki Gobierno ta reafirma su deseo pa sigui cerca di pueblo, presente den bario y comunidad, trahando hunto cu ciudadano nan pa crea mas oportunidad, mehora e calidad di bida y fortalece e orguyo nacional pa nos futuro generacionnan.