Minister Geoffrey Wever:
ORANJESTAD (AAN): Minister di Finansa, Asunto Economico y Sector Primario, mr. Geoffrey Wever, hunto cu Minister di Enseñansa, Hubentud, Innovacion, Relacionnan di Reino y Deporte, Gerlien Croes, ta anuncia cu registracion pa Programa Piskechi a habri oficialmente!
E programa ta brinda mucha y hoben entre 10 y 17 aña un oportunidad pa si ña y un di e tradicionnan mas autentico y balioso di Aruba: e arte di pesca na man. Por registra via e link riba red social di Minister Wever y Minister Croes, of door di scan e QR Code adhunto.
Programa Piskechi a inicia cu e meta di preserva y pasa nos conocemento tradicional pa e siguiente generacion na un manera accesibel. Den un mundo cu ta cambia rapidamente, ta importante pa sigui comparti e habilidadnan, balornan y respet pa e arte di pesca, cu ta forma parti di nos identidad como Aruba.
Un weekend pa luna, un curso lo tuma lugar. Un diasabra y diadomingo mainta lo forma un curso, y na final , e participantenan hoben lo ricibi un certificado. Programa Piskechi ta planea pa ripiti te cu November (cupo limita)!
E programa lo combina teoria cu practica, permitiendo hobennan siña tocante diferente aspecto di pesca tradicional, sguridad na lama, respet pa medio ambiente, y e importancia historico y cultural cu pesca tin den nos comunidad.
Mas cu solamente siña con pa tira un liña den lama, Programa Piskechi ta enfoca riba crea conexion entre generacionnan. E curso ta brinda espacio pa conocemento y experiencia pasa for di esnan cu a practica e tradicion aki durante hopi aña medio di partner Oasis Fishing & More, pa hobennan cu tin curiosidad di conoce mas tocante piscamento na Aruba.
Ministerio di Sector Primario ta kere cu e programa aki ta esencial pa mantene bibo nos tradicionnan y alabes inspira hobennan pa aprecia e recursonan natural cu nos isla tin pa ofrece. E programa ta promove responsabilidad, disciplina, pasenshi y amor pa nos lama y medio ambiente.
Mayornan y hobennan interesa ta wordo anima pa probecha di e oportunidad special aki. Si abo of bo yiu tin entre 10 y 17 aña y kier siña e arte tradicional di pesca na man, no laga e oportunidad aki pasa.
Pa sigui fortalece e comunidad di pesca y Sector Primario, Gabinete AVP-Futuro a renoba pier di Savaneta (ex-Brisas del Mar). Minister Wever a indica cu ta importante pa e cultura aki keda biba den e generacionnan cu ta sigui nos.
Sostene e Sector Primario, ta un obhetivo clave pa Minister Wever, y cu e motivacion aki, a lansa, cu sosten di su colega Minister Croes; Programa Piskechi.
Registracion ta habri awor viai e link correspondiente riba e red social di Minister Wever y Minister Croes of door di scan e QR code.
Tradicion y futuro ta bin hunto den Programa Piskechi. Registra awo y laga bo yiu forma parti di e experiencia aki.
