Ronella Croes, CEO DI ATA:
*Preparando pa Dia Mundial di Turismo otro siman!
ORANJESTAD (AAN) – Señora Ronella Croes, CEO di Oficina di Turismo di Aruba (ATA), den cuadro di e inauguracion di e conferencia global di turismo, a menciona den entrevista cu DIARIO, cu e aña aki tin celebracionnan particular na Aruba, y den esaki e conferencia global cu ATA a sostene pa prome biaha, Diamars cu a pasa.
“Pa prome biaha Aruba ta uni e mercadonan di Latinoamerica, Europa y Norte America, den un conferencia. Y asina aki, nos ta inicia nos celebracion di e Dia Internacional di Turismo, cu ta otro siman, pa cual nos tin un enfoke separa pa nos stakeholders en total”, Ronella a expresa.
CEO di ATA a agrega cu nan ta comparti diferente aspecto cu si no mitiga nan aworaki, lo bira retonan mas grandi, pasobra nan ta retonan caba.
Durante e conferencia global ATA tabata tin presente su audiencia local y internacional, locual ta importante. “Y un di e decisionnan cu nos a tuma ta cu tin, sigur, cu subraya cosnan positivo di Aruba: nos ta bendiendo Aruba, na final di dia, akinan; pero tambe nos tin cu uni nos mes na diferente reto global y local. Cosnan cu no ta desconoci pa e mundo di turismo. Entre otro, ampliacion di hotelnan cu nos tin, cu ta un oportunidad pa capitaliza di dje, sigur, pero nos mensahe awe ta cu nos mester maneh’e na un manera debido, pa no bira un reto cu no ta presente awo, of kizas cu por bira mas grandi”, COE di ATA a subraya.
El a añadi: “Esaki kiermen cu tur cos cu wordo haci pa proteha nos naturaleza, medio ambiente, pero tambe pa maneha e aspecto di labor, debidamente, pensando aki kizas riba importacion di labor, forza laboral cu ta necesario, ampliacion di esaki sigur. Y kico esey kiermen? Cooperacion riba e aspecto social, bo seguridad, bo vivienda, educacion, salubridad. Ta cosnan cu no ta Aruba so ta confronta, pero ta conoci den e mundo di turismo global, y ta importante pa nos menciona, na nos socionan local y internacional, na unda Aruba ta”, Ronella Croes a señala.
El a expresa cu, claro, na mesun momento nan ta keda papia di seguridad y con pa keda mantene un punto clave cu ta preferencial pa Aruba, pero tambe ta papia di e atencion cu Aruba ta bin ta pone riba e capacidad di carga. “Y sikiera nos por a mustra hopi paso cu no solamente ATA, pero otronan envolvi a bin ta tuma y ta sigui tuma, pa nos por contraresta retonan y mitiga. Pues, inversionnan den nos playanan, den embeyecimento di nos producto, upgrade, entrenamento di nos hendenan, nos seguridad, diferente atraccionnan nobo cu nos ta trahando riba dje, tur esey ta sirbi pa nos a duna e mensahe clave, cu Aruba ta conciente cu tambe tin reto manera otro destinonan pero kico nos ta haci pa mitiga esakinan”, CEO di ATA, Ronella Croes, a señala.
