Gobierno tambe a uni na conmemoracion di 20 aña di atake riba Twin Towers

ORANJESTAD (AAN): Durante fin di siman Aruba a conmemora 20 aña di e atake riba Twin Towers, 9/11 durante un ceremonia solemne na Kazerne di Brandweer.

Prome Minister a hiba un discurso reconociendo e gran esfuerso di hopi persona riba e fecha aki accentuando e hecho cu ta para den union cu Merca y tambe cu esnan cu a perde un ser keri a causa di e atakenan aki.

            “Aruba ta para den union cu nos amigonan na Merca cu e compromiso di nunca lubida loke a pasa y di sigui comprometi pa busca paz. Paz no ta bin di mes, nos mester crea paz y nos mester inculca e lucha pa paz den nos muchanan”.

            Hopi persona ainda ta corda exactamente kico nan tabata haci na momento cu e atakenan a inicia 20 aña pasa riba e Twin Towers. Premier Wever - Croes den su discurso a expresa cu na e momentonan ey e tabata na trabou trempan pa atende un reunion, pero na mesun ocasion e no por a kere locual tabata tuma luga ora cu a mira e edificionan cay den otro. “Un sentimento cu hamas mi lo por lubida”, Prome Minister a expresa.

            Prome Minister Evelyn Wever - Croes: “E fecha aki a keda marca den historia como un di e peor fechanan pero sigur e tabata un momento cu a saca e miho di hopi hende a traves di entre otro union, amabilidad y resiliencia. P’esey ta importante pa sigui honra y recorda e fecha aki y compromete pa guia nos muchanan den un futuro cu respet pa otro a pesar di diferencianan, cu fe y union”.