ORANJESTAD (AAN): Riba Diamars, prensa di peninsula di Guajira na Colombia a raporta cu cuatro cadaver den
estado avanza di descomposicion a wordo haya ta drief na costa di e sector di comunidad Bahía Honda, na municipio di Uribia.
E area di Bahía Honda ta situa como 190 km pabao di Aruba, den area di Alta Guajira.
E curpanan sin bida a wordo detecta pa piscadornan den e area, kendenan no a logra identifica nan pasobra e caranan a wordo comi kizas door di animal di lama of desfigura debi cu nan a keda asina hopi tempo den lama. Pero nan por a mira si cu ta trata di homber, debi na e tipo di paña cu nan tabatin bisti.
Pero Polis ni Guardacosta Colombiano no a bisa nada oficial di e asunto aki na prensa.
Sinembargo esnan cu ta biba den e pueblo, a bisa cu kizas nan lo por ta e piscadornan cu a wordo raporta como desapareci recien, of nan por ta otro nabegantenan cu a sink cu nan boto.
Na Juli 2018, dos curpa di dos homber den estado avanza di descomposicion a wordo haya door di piscadornan di e comunidad di Punta Espalda, y na 2012 tambe a raporta cu a haya varios curpa den descomposicion na beachnan di Alta Guajira.
