ORANJESTAD (AAN): Siman pasa Guizza Maria Steenvoorde a yega Aruba cu e corona y titulo prestigioso di Miss Teen Universe 2025.
Na Aeropuerto Internacional Reina Beatrix, Prome Minister mr. Mike Eman, Minister di Relacionnan di Exterior mr. Gerlien Croes y Minister di Turismo mr. Wendrick Cicilia a duna Guizza un bonbini caluroso y a felicit’e pa su logro historico.
Guizza a gana e titulo maximo durante final di certamen di beyesa Miss Teen Universe 2025 dia 13 di april na Punta Cana caminda despues di shete dia di competencia entre 29 candidata, a sali como ganadora.
Minister di Turismo a gradici Guizza pa representa Aruba cu dignidad: “Bo ta un ehempel pa nos comunidad—ora tin determinacion, no tin limitacion.” Minister Gerlien Croes a agrega: “Pa nos como isla chikito cu nos ta, ta ilustra con fuerte nos ta como pais y bo a laga Aruba su nomber na halto. Bo ta un inspiracion pa nos hobennan.”
Prome Minister mr. Mike Eman a conclui cu: “Aruba ta orguyoso di bo. Bo ta un rolemodel pa hopi hende.” Guizza Steenvoorde ta mas cu un reina di beyesa – el a bira simbolo di inspiracion pa hoben Arubano riba un tarima mundial
