Diabierna tin Parada y Diasabra e Entiero
- Publico por cana tras di trailer pero bin bisti cu paña colorido
- Diasabra mainta por despedi na Aurora Funeral Home
ORANJESTAD (AAN) Darren Van Ommeren, Presidente di SMAC a hiba palabra den Conferencia di prensa, relaciona cu e despedida postumo di e gran baluarte musical y Icono Cultural di Aruba Robert Jeandor. El a duna informacion tocante e actonan di despedida cu ta bay tuma lugar e dianan 26 y 27 di September awo.
“Diabierna 26 di September, nos ta coordinando, den e caso aki: “Sinfonia di una Leyenda”, cu ta un homenahe musical dedica na señor Robert Jeand’or. E parada aki lo sali lo sali pa 5’or en punto for di Aruba Entertainment Center, riba un bon tempo esaki lo cana parti di Avenida Milo Croes, drenta Vondellaan, y lo ta terminando na haltura di Cas di Cultura. Aki na Cas di Cultura, nos ta programa pa yega mas of menos 6 or di atardi. “Tanto riba caminda como na Cas di Cultura, nos ta bay tin un homenahe musical den cual diferente artista di Aruba lo ta presentando tanto cancionnan cu Solo Banda Show a toca riba paradanan di carnaval, mirando cu esaki ta un ruta cu Robert, pa mas di 30 aña, a dedica su arte y su musica riba e ruta aki.
Pafo riba caya, net pabao di Cas di Cultura cu speakernan dirigi panort pa wordo scucha riba Vondellaan, Plaza Libertador Betico Croes, y tambe Plaza Libertador Bolivar, e ora ey, pa 6 or ta cuminza e homenahe musical den cual nos ta bay tin presentacion di diferente artista conhuntamente cu Solo Banda Show, y tambe riba e anochi aki lo bay tin diferente discurso di tanto mandatarionan, como famia, amistadnan, stichtingnan invita, cu lo ta dedicando un of otro palabra na señor Robert Jeand’or. Esaki lo culmina mas of menos pa 9 or di anochi. Ora cu e culmina, hunto cu henter pueblo di Aruba, nos lo tin e cancion sigur mas grandi di Robert, un tumba di dje cual Solo Banda Show lo presenta como despedida di e anochi aki.
“Mester informa cu pueblo di Aruba henter ta bon bini. Di mes, mi ta kere ta na su luga lo wordo cera parcialmente, segun e parada ta bay ta pasando riba e ruta di Avenida Milio Croes y Vondellaan. Akinan, nos ta invita henter pueblo di Aruba pa bin join, pa tuma despedida y nos celebra e bida di Robert na un forma grandi. Si bo kier participa den e parada aki, ta posibel. Deseo ta pa no bin na row bin na bisti colorido, colornan di ambiente, mirando cu esaki Robert a expresa henter su bida”, Darren van Ommeren a menciona.
El a agrega cu esnan cu kier bin bisti cu un jacket of un parti di costume di carnaval lo ta altamente aprecia, pa por cana den e ultimo parada aki hunto cu Robert Jeand’or. Van Ommeren a indica cu shersh ta bin dilanti, trailer su tras (cu spearkernan dirigi patras), famia y amistad y invitadonan por join riba e tononan musical di Solo Banda Show.
Finalmente, Van Ommeren a bisa cu durante e anochi na Cas di Cultura, tur hende ta bon bini, di manera ordena tur hende tin chens pa dispidi di Robert Jeand’or, y duna condolencia.
“Pa loke ta Diasabra 27 di September, nos lo ta saliendo for di Misa di Santa Cruz pasa na Aurora, pasa na Cas di Robert, pasa Alto Vista, tambe na unda el a train pa hopi aña largo, den e caso aki ta Arsenal. Robert ta reposando na Misa di Santa Cruz pa mas of menos 1’or te cu 4’or di atardi. 4’or lo celebra Santo Sacrificio di Misa, y di akinan si, den un seno familiar nos lo ta regresando na Aurora unda cu hunto cu famia, lo ta haci e parti di cremacion di Robert. Tene cuenta cu Diabierna e trafico ta parcialmente cera.”
