Parada y despedida publico
ORANJESTAD (AAN): Dialuna atardi, durante un conferencia di prensa special di Gobierno di Aruba riba e topico Acto di Despedida di Robert Jeand’or, famia di Robert tambe tabata presente na unda cu yiu homber di Robert, Robertico a hiba palabra, na prome luga pa gradici Aruba henter y tur esnan cu a stima Robert durante su carera como musico, cu unda di parti di mundo cu el a bay, Robert tabata hopi orguyoso di ta parti di Aruba.
Den nomber di Famia, nan ta invita e famia di musiconan, comunidad di Dominicano cu a adopta Robert como un yiu y cu a significa hopi p’e, y pueblo di Aruba en general cu a traves di su musica a conoce Robert Jeand’or, pa bin cu un lenso na e celebracion di bida musical di Robert Jeand’or.
Riba Diabierna esaki no ta un despedida, esaki ta un celebracion, Robertico a expresa, cu lo tuma luga diabierna awo, 26 di september, cu un parada y despedida publico hopi bunita y special pa nos gran musico yiu di tera, e legendario, Robert Jeand’or.
Manera DIARIO a trece dilanti caba den edicion di Dialuna, e parada lo cuminsa 5’or di atardi na Aruba Entertainment Center y lo yega Cas di Cultura pa 6’or di atardi. Di 6’or pa 9’or lo tin oportunidad pa tuma despedida di Robert pabao di Cas di Cultura durante un homenahe pa celebra bida di Robert Jeand’or. Acto di Belorio y Cremacion lo tuma luga diasabra 27 di September na Misa di Santa Cruz, y na final na Aurora Funeral Home pa cremacion.
