ORANJESTAD (AAN): Dia 25 di oktober lo tuma lugar e tremendo evento di boxeo titula ‘The Tittle 3’ na Aruba.
Relaciona cu e tremendo evento di boxeo internacional aki, e conocido programa di television ‘Racha di Boxeo’ y ‘Aruba Boxing Commission’, a uni forsa pa trece dos grandi di boxeo na Aruba.
Ta trata di dos eminencia den e mundo di boxeo. Un ta un legendario referee di taya mundial y e otro ta un hues respeta cu lo tin na nan encargo algun clinica sumamente interesante.
Ta trata di e legendario referee Tony Weeks y e tambe conocido hues di taya mundial, Steve Weisfeld cu lo ta encarga cu e clinicanan planea pa tuma luga 17, 18 y 19 oktober. Mester menciona cu Weisfeld tabata un di e huesnan cu a traha den e pelea entre Canelo y Crawford recientemente.
‘Racha di Boxeo’ y ‘Aruba Boxing Commission’ ta extende un invitacion na tur dirigente, arbitro y hues cu ta interesa na participa den e clinicanan, cu ta tuma luga den sala di ‘Colegio E.P.I.’ situa na Playa, ta mas cu bonbini. Participacion na e clinicanan aki ta gratis.
