Centro di Bario Noord ta invita comunidad pa check productonan fresco Diabierna mainta

Dia Mundial di Agricultura y Alimentacion

ORANJESTAD (AAN): Comunidad ta wordo invita pa bay descubri, cumpra y disfruta di productonan fresco, natural y, naturalmente local na Centro di Bario Noord.  Esaki den cuadro di Dia Mundial di Agricultura y Alimentacion 2026.

   Nan lo tin un Mercado di Agricultura y Alimentacion, un oportunidad pa descubri, cumpra y disfruta di productonan fresco.  E actividad lo tuma luga riba Diabierna 16 di October 2026, di 10:00 am te cu 2:00 pm na Centro di Bario Noord. Durante e mercado, bishitantenan lo tin oportunidad pa cumpra mata pa solamente 5 Florin, hunto cu fruta, berdura y hopi otro producto fresco, cu atencion special pa loke e cunukero- y productornan local tin pa ofrece.

   E mercado ta un invitacion pa pueblo di Aruba pa reconoce y aprecia e trabao di e hendenan cu ta cultiva nos tera y ta contribui na produccion di alimento fresco pa nos comunidad. Tras di cada mata, fruta y berdura tin dedicacion, trabao y esfuerso di hende cu ta sigui cultiva y produci, no obstante e retonan cu agricultura local por trece.

   Centro di Bario Noord kier duna productor local un plataforma pa presenta nan productonan directamente na publico. Asina, e comunidad por conoce mihor loke ta wordo cultiva localmente, mientras cu e cunuceronan mes ta haya mas visibilidad pa nan trabao y nan oferta. Un oportunidad pa cumpra local.  Cumpra producto local no ta solamente un manera pa yena bo cas cu alimento fresco; ta un manera pa mustra sosten y aprecio na nos tera y pa nos propio productor. Ora nos scoge fruta, berdura y otro producto cultiva of produci aki na Aruba, nos ta contribui na un cultura di consumo mas consciente y na e continuacion di actividadnan agricola local. Ademas, e mercado ta ofrece un oportunidad pa famianan, habitantenan y otro interesadonan pasa un momento agradabel, descubri productonan fresco y conoce mas di loke Aruba tin pa ofrece den area di agricultura y alimentacion.

   E celebracion di “Dia Mundial di Agricultura y Alimentacion” ta brinda un momento special pa reflexiona riba e importancia di agricultura, siguridad alimentario y e papel cu cada un di nos por hunga den sosten di produccion local. Apoya nos cunukseronan y productor ta un paso importante pa fortalece e conexion entre productor y consumidor. Centro di Bario Noord ta extende un invitacion cordial na henter pueblo di Aruba pa participa den e mercado y duna nos productor local e atencion cu nan merece.