Gobierno ta felicita parlamentario Berlis y fraccion di MEP cu mocion entrega

Cu e ley pa ningun politico corupto of sospecha di corupcion por bira parlamentario

ORANJESTAD (AAN): Diamars, durante tratamento di Presupuesto 2022, Parlamentario Marco Berlis a entrega un mocion pa Parlamento concipia un ley di iniciativa cu lo percura pa salbaguardia e imagen di Parlamento.

            A base di principionan di Integridad, Gobierno di Aruba ta elogia e iniciativa aki y ta haya aprobacion total mirando tambe cu Parlamentarionan ta figuranan den nos comunidad cu mester ta un ehempel pa pueblo.

            No ta un secreto cu den Parlamento actualmente, tin un miembro cu ta acusa di diferente actonan penal entre otro, manera describi pa Ministerio Publico, soborno (omkoping), abuso di cargo (ambtsmisbruik), labamento di placa (witwassen) y participacion na un organizacion criminal (deelname aan een criminele organisatie).

            Mirando cu actualmente, no tin un ley ancra pa evita un politico cu ta sospechoso di actonan penal asina bira parlamentario, ta keda un berguensa grandi pa nos pais y tambe pa nos nomber internacionalmente wordo mancha cu un representante cu ta wordo acusa di corupcion, cu por cierto ta wordo considera e acto di corupcion mas grandi di nos pais.

            Gobierno di Aruba ta felicita Parlamentario Berlis y Parlamentarionan cu ta para na banda di Integridad mustrando asina cu Integridad no solamente mester wordo menciona sino practica.

            Cu e aprobacion di mayoria den Parlamento, pronto esaki lo ta ancra den ley pa asina ningun politico corupto of sospecha di corupcion por drenta Parlamento pa representa un pueblo digno di wordo respeta.