E nivel cu a causa desastre politico pa Aruba a wordo rebiba --- *Japon di Prome Ministro ta parti di contenido oficial di reunion --- *Temor cu DIARIO a expresa a bira realidad den sala di Parlamento
ORANJESTAD (AAN) — Ayera ya e prome cinco dianan di luna di April 2022 a bira parti di historia di un mundo, cu no conoce su destino mas cercano.
E realidad mundial tabata parce realidad di otro planeta, si a sigui e reunion di Parlamento di Aruba cu a tuma lugar den e siman cu tambe mester bira decisivo pa aspectonan importante di e caso historico y sumamente preocupante pa democracia, cu ta e caso penal contra Benny Sevinger, te ainda Miemhro di Parlamento di Aruba.
Pa analisa loke a pasa ultimo dianan den sala di Parlamento di Aruba, mester bolbe na e tarea cu Pueblo ta pone den man di su representantenan pa cuida placa y asina e bienestar financiero di Pueblo.
E Derecho di Budget, di dicidi kico Aruba ta haci cu su gastonan y entradanan, ta bira realidad den e tratamento di Presupuesto den cual e cifranan di Aruba durante 2022, ta wordo atende.
Parlamento mester duna aprobacion na Gobierno pa gasta sumanan, cu ta wordo prepara na prome lugar a base di e cifranan real di e aña anterior, cu ta wordo adapta na exigencianan nobo, cu Gobierno mester describi .
Falta di sentido di responsabilidad hancra den e Derecho di Budget, a haci posibel pa den pasado Parlamento a entrega na Mike Eman e suma di 1.6 Biyon pa e haci y deshaci pafor di Presupuesto, pues sin control di Parlamento y hasta di Hulanda posibel.
Na e momentonan aki tin mas cu suficiente prueba pa exigi seriedad pa atende cu placa di Pueblo. E experencia cu Hospital cu na e momentonan aki ta den Intensive Care financiero a base di e abuso di Gobierno Mike Eman cu placa di Aruba, ta mas cu suficiente motibo pa cifranan di Aruba a haya e atencion debido.
Wega y mas wega politico tabata loke a resalta den e reunion, cu mester a entrega na Aruba e claridad di loke ta haci cu su placa.
Ta esaki ta e esencia di un reunion publico pa trata presupuesto, pues splica Pueblo kico e maneho di su placa ta.
Pa e Arubiano cu a bringa pa su autonomia financiero, mester tabata doloroso pa nota con e reunion a wordo uza dor di oposicion pa haci politica pero na un nivel pio cu bergonzoso.
E punto central no tabata con Aruba ta prepara pa atende cu su placa na un momento cu ningun hende sa kico ta bay pasa cu mundo. E punto central tabata con Oposicion por a baha Evelyn Wever-Croes sin cu a bini dilanti, cu kende oposicion kier a reemplasa Evelyn Wever-Croes.
E momento cu Aruba mester a uza pa hunto mira con ta pasa den e temponan di problema mundial serio, cu ta subi tur prijs y ta haci bida mas dificil pa tur hende, a bira un wega politico pa mira con oposicion por manda Gobierno cas.
E nivel di oposicion a skirbi historia. Benny Sevinger a cuestiona hasta japon di Prome Ministro Evelyn Wever-Croes.
Oposicion no a bay reunion pa atende cu cifranan di Aruba, pero na prome lugar pa baha Prome Ministro Evelyn Wever-Croes y asina pues den un tempo di crisis mundial, baha Gobierno di Aruba.
Parlamento di Aruba, representacion di e Pueblo di Aruba cu a lucha pa na 1983 logra su Status Aparte y asina su propio Parlamento, a conoce otro momento tragico.
E japon di Evelyn Wever-Croes tabata importante. Mas importante cu e realidad di Aruba como parti di mundo cu no ta na haltura kico ta socede awe.
Analisando con den Parlamento ayera e esfuerso di oposicion na prome lugar tabata basa riba kiebra di Gobierno Wever-Croes, nos por a comprende pakico awe tanto hende ta perde nan bida na Ukraine.
Den sala di Parlamento di Aruba por a mira e wega politico di oposicion, cu no tabata interesa den rapportnan y cifranan cu ta mustra con Evelyn Wever-Croes a scapa Aruba di e desastre cu Mike Eman a laga atras.
Den sala di Parlamento di Aruba ayera, oposicion a presenta e realidad di Vladimir Putin, cu no conoce limite ora e mester lucha pa e haya poder na Ukraine, e bira poderoso aunke mundo stop di existi.
Egoismo politico, sed pa poder, destruccion di Evelyn Wever-Croes pa Mike Eman haya poder, tabata e contenido berdadero y directo cu oposicion a duna na loke mester tabata tratamento di e base financiero di Aruba den un crisis mundial.
