Minister Maduro a reacciona riba ponencia di sindicatonan --- ORANJESTAD (AAN): Minister di Finansa y Cultura, Xiomara Maduro a reacciona un biaha mas riba e ponencia di e sindicatonan
cu ta mustrando cu nan no ta sigui entrega 12.% di nan salario y cu den nan opinion gobierno ta mal informa pueblo con tur cos a bay.
Durante un entrevista na Telearuba den Telenoticia, e mandatario a papia cla y rasca un biaha mas cu locual e sindicatonan ta bisa cu gobierno ta mal informa pueblo, el a expresa cu esey absolutamente no ta berdad.
Gobierno ta brindando e informacion den tur transparencia riba loke ta e finansas publico. Den e 'uitvoeringsrapportage', na pagina 43 mes den bijlage 2, tur informacion cu e sindicatonan tabata tin mester tey. Ta raporttnan cu ta existi for di aña pasa caba.
E minister a enfatisa cu tur informacion ta wordo duna den tur transparencia riba gobierno.aw tambe.
For di e momento cu gobierno a cuminsa negocia cu Hulanda aña pasa te na presente, na cada paso a brinda e informacion necesario na pueblo di Aruba como na Parlamento. Banda di esaki, dos siman pasa, gobierno a reuni cu tur e sindicatonan na JFK Center unda a duna nan un presentacion di e situacion financiero di pais Aruba y tambe a informa nan riba e recorte aki di 12.6%.
A bisa nan tambe cu gobierno a manda un carta pa Conseho di Minister di Reino den cual a manda pidi nan pa otro aña e recorte aki por wordo corta na mitad, kiermen, duna bek e parti aki di salario y despues e aña siguiente e otro mitad.
E mandatario a sigui bisa cu ta trata di informacionnan cu e sindicatonan a haya den tur transparencia.
