ORANJESTAD (AAN) – Darline Guedez-Erasmus, Parlamentario di fraccion di Partido Movimento Electoral di Pueblo (MEP), a hiba palabra den conferencia di prensa di e fraccion, Dialuna.
E parlamentario a referi na e 2.700 personanan cu desde final di November aki, lo no ta ricibiendo FASE mas. E meta primordial aworaki, ta pa pone e personanan na trabao.
“Gobierno di Aruba no a tarda, pero a tuma accion di biaha, pa asina bin cu un proyecto integral, na unda hopi departamento tey pa pone nan, mas pronto posible, na trabao bek y forma matching di e buscado di trabao y e dunador di trabao. E programa aki yama ‘Aruba kier traha’. Tambe ta bin un curso, como prome stap, pa e hendenan por bay sigui e curso aki, cu lo cuminza e prome siman di December”, Guedez a bisa.
El a menciona cu den e prome parti nan lo haya e curso di motivacion pa cambia nan mentalidad pa nan por sigui haci un trabao.
E di dos parti ta encera interview, y siña con pa comporta ora di busca un trabao, con pa bay bisti, y con pa traha carta pa solicitud. Asina e persona por sa con pa yuda su mes, loke ta hopi importante. Asina parlamentario Guedez-Erasmus a bisa.
El a agrega cu e curso aki ta parti den cuater sesion di dos ora y parti den cuater dia, y lo tin un grupo di 25 hende cu lo participa, y demas persona tiki, tiki lo wordo yama segun con trempan nan a haya e FASE.
“Kiermen, tur hende lo wordo yama, y mi ta haya cu e curso aki ta hopi importante pa bo participa. Si bo ta mirando cu bo a perde bo trabao den tempo di Covid, y bo ta riba FASE, mi kier encurasha bo pa bo participa. E curso, manera mi a menciona, ta yama ‘Change of mindset’. E curso ta importante pasobra pa bo haya y mantene bo trabao, e actitud cu bo pone den esaki ta importante” segun e dama parlamentario.
Finalmente, el a expresa palabranan pa gradici pa tur cu a pone nan esfuerzo den e programa “Aruba kier traha” pa asina por brinda e ciudadanonan un trabao atrobe.
