Minister Rocco Tjon a splica: --- ORANJESTAD (AAN) – Diabierna 17 di December, Gobierno a yama un conferencia di prensa, den cual a firma un Memorandum of Understanding (MoU) entre gobierno,
y e instancianan Respaldo, Fundacion Anti-Droga Aruba (FADA), FMAA, HAVA y SPD.
Minister di Husticia y Asunto Social Rocco Tjon a hiba palabra, y a expresa su satisfaccion na momento cu a bay firma un Samenwerkingsprotocol cu e instancianan menciona.
El a cuminza pa gradici director di FADA, Juendel Sprok, Docter Jones di HAVA (Asociacion di Docternan di Cas Aruba) señor Randall van Trigt di Fundacion pa Maneho di Droga Aruba, señora Dalgis Montalvo di Departamento Social Psiquiatrico y Docter van Gaalen di Respaldo.
Minister Tjon a considera e momento aki hopi importante y algo cu no por a wordo concretiza sin cu e instancianan aki a duna di nan parti y a fiha nan compromiso pa esaki. E mandatario a indica cu e no ta solamente importante pa gobierno, pero pa e cuido accesible y e calidad di cuido cu lo kier brinda cada ken cu mester di dje, ya sea pasobra mester surpasa retonan di adiccion of di salud mental.
Minister Tjon a gradici tambe e stuurgroep, cu a wordo instala pa Departamento di Asunto Social door di señora Glenda Hernandez, docter Maduro cu ta traha na Ministerio di Asunto Social, y e representante di e parti huridico. El a reitera cu esaki ta un momento hopi importante, cu nan no por a lague bay sin mas.
E dignatario a para keto un rato den locual esaki ta bay nifica: “E ta bay significa den practica cu nos lo por haci mas cu menos recurso y tambe ta bay tin un valor agrega sigur, pa e cuido cu nos ta bay brinda tur esnan cu mester di esaki. Kiermen, e cuido ta bira mas accesible”, Tjon a señala.
El a splica cu e protocol ta ancra den e “piramid model”, si por yame asina, cu lo fortifica e ‘eerste lijn’ y asina haci e zorg aki mas accesible pa tur cu mester di dje.
Tjon a menciona cu nan a identifica e cuido basico, pa loke ta e 2de lijn y na mesun momento mas cuido specializa cu ta e 3de lijn, y a reitera cu atravez di e protocol aki tur e partnernan por percura cu e persona cu mester di e cuido, por haye mas lihe y na un manera hopi miho, y manera ta para den e protocol e “match care” cu cada persona tin mester.
E mandatario a sigui bisa cu un parti hopi importante tambe, ta e palabracionnan cu a wordo haci pa loke ta futuro, unda cu e departamentonan lo keda reuni cu otro, pa asina cada bez percura pa e cuido cu mester wordo brinda por sigui mehora.
Minister Rocco Tjon a referi na FADA cu ta percura pa e parti di prevencion y crea concientizacion, pasobra e ta kere cu ta hopi importante pa kita e tabu pa loke ta adiccion y locual ta trata e tema di salud mental.
Un persona cu mester di e cuido aki, tin cu sinti su mes liber pa bay busca e ayudo aki sin sinti su mes señala pa e comunidad.
Minister Tjon, finalmente, a bisa cu den futuro e ta kere ta necesario pa lanta un “vast stuur groep” cu ta importante y di valor agrega pa Aruba. El a conclui reiterando su palabranan di gratitud pa e compromiso mustra pa e partnernan menciona y ta spera cu den futuro lo keda mehora mas y mas e aspecto di cuido aki.
