Bom hereda ta rementa den man di Wever-Croes den drama sin fin conoci - *Cuatro Constitucion ta topa den Reino mara na otro den un Statuut --- *E pagador di belasting Hulandes no ta pordona politco Hulandes cu faya
ORANJESTAD(AAN)—Awe mundo, cu ta inclui Reino Hulandes y e islanan Hulandes den Reino (entre nan Aruba) no tin tempo mas pa papia.
Awe den Reino pa paisnan por atende cu otro y yega na solucion, mester practica berdad.
Pa cuminsa mester admiti cu Prome Ministro Evelyn Wever-Croes a hereda un bom di tempo, cu a rementa den su man.
E bom di tempo cu el a hereda, tabata e placa di Aruba cu a wordo abusa dor di Gobierno Mike Eman, manera Reino a duna prueba, ora Reino a atende cu Gobierno Mike Eman y a introduci supervision, cu ta contra autonomia riba cual
Statuut ta basa pero cu di otro banda tambe ta directamente mara na e responsabilidad di Reino Hulandes, hancra den e Statuut cu mester tene na consideracion e bienestar di ciudadanonan Hulandes den un constitucion cu conoce un Rey.
Ora papia di Statuut no ta papia di un constitucion pero di e forma cu e diferente partinan di Reino ta mara na otro.
Tin un Constitucion di Reino. Un Constitucion di Aruba. Un Constitucion di Hulanda. Un Constitucion di Curacao y un Constitucion di Sint Maarten.
Den Statuut a busca salida pues pa tur problema cu por presenta pero a tene cuenta cu un aspecto importante, cu sigur a bini dilanti ora Aruba tabata prepara Status Aparte y a papia di comparti e encargo di paisnan mas pober den Reino.
E tempo a papia di un Solidariteitsfonds pa medio di cual Aruba y Curacao lo a yuda e paisnan mas pober.
Esaki ta caracterisa e berdad di Reino cu ta e base di Statuut manera pronuncia dor di Reino Wilhelmina na London: “Steunend op eigen kracht doch met de wil elkander bij te staan”, cu ta nifica cu tur pais mester para financieramente riba nan pia pero cu e deseo pa sostene otro.
E paisnan den Reino a conoce diferente programa di asistencia cu cual a construi paisnan desaroya cu mester tabata base pa prosperidad.
Reino Hulandes a vigila bienestar di Aruba.
Hulanda a actua den e areglonan di garantia pa proyectonan hotelero den e prome gobierno di Aruba.
Hulanda a actua y a baha Mike Eman for di Fort Zoutman ora Aruba tabata zink.
Na 2017 Evelyn Wever-Croes a hereda un Aruba destrui dor di abuso di placa di Aruba cu sosten di e miembronan di Parlamento di AVP, cu a deshaci di nan control dor di entrega Mike Eman e pot di 1.6 Biyon cu nan no por a controla.
Di e forma aki Parlamento di Aruba a destrui e base di Statuut cu ta papia di propio forsa di e pais. Parlamento di Aruba, durante Gobierno Eman, a destrui e base di Statuut ora el a permiti creacion di e debe nacional.
Gobierno ta continuidad. Esaki ta e motibo cu e bom a rementa den man di Evelyn Wever-Croes na 2017 ora mester a evita cu Aruba ta bay bancarota.
Na 2020 DIARIO a opone e pensamento Hulandes pa kita autonomia real for di Parlamento. Nos no a cambia. Pero nos ta biba cu realidad.
Gabinete Wever-Croes a haci un bon trabou. Pero kico lo pasa si e mester baha? Aruba no ta propiedad ni di Mike ni di Evelyn, pero di e Pueblo cu Reino mester proteha.
Na e momentonan aki Hulanda ta den un problema mas serio cu Aruba pa loke ta trata Covid-19. Kico e politico Hulandes mester haci?
Votadornan Hulandes lo baha Gobierno Hulandes si nan no tene bienestar di e Pueblo Hulandes na bista!
Awe realidad mester garantisa sobrevivencia di Aruba.
Comercio, sindicato, gobierno, tur ciudadano y habitante di Aruba tin un deber cu e pais.
Kico Gobierno y mayoria di Parlamento a haci cu Aruba durante 2009 pa 2017? Con a defende interes di Aruba segun Constitucion? Lubida! Hulanda a defende e derecho constitucional di e Arubiano di acuerdo cu Statuut na 2014 ora a actua contra Gobierno Mike Eman.
Pone un fecha pa “tot nader orde” pero teniendo cuenta cu realidad cu no por wordo gescrap!
Si Parlamento di 2009 pa 2017 a percura pa supervision Hulandes, cu a scapa Aruba, awe den un pandemia sin final conoci, awe mester tene cuenta cu realidad na interes di Aruba!
