ORANJESTAD (AAN); E siman aki, Frans Ponson di Comerciantenan Uni a bisa cu e deal firma entre Eagle LNG y WEB Aruba NV, y cu e asunto a wordo trata den Parlamento,
na final ta hisa hopi pregunta ta con e sistema Parlamentario y Gubernamental ta trahando riba e isla aki.
Comerciantenan Uni ta compronde cu tin un Non-Disclosure Agreement entre e dos companianan, pero toch ta mira cu ora bo cera un deal pa 20 aña largo, esaki ta core trece varios punto dilanti, esta si acaso tabatin Destaho Publico, etc.
Frans Ponson a bisa cu e Comerciantenan Uni a haci un research y a descubri cu otro aña ya no ta bay tin hopi uso mas di Gas Natural, y na Aruba ta firma un deal pa 20 aña largo.
E gremio a indica cu nan a keda sorprendi cu Parlamentarionan a sostene e deal aki, siendo cu nan no a ni haya e contract pa mira. Con bo por sostene algo, siendo cu bo no sa e contenido di e contract.
Ken na Aruba lo hipoteca su cas pa asina haci compra p.e. di un negoshi, sin cu ta mira e documento di negoshi? E ta algo incomprendible.
Varios Comerciante a indica cu nan ta deposita tur nan confianza den Parlamento, sperando cu nan lo haci nan trabao na defensa di Aruba, y bo ta spera cu nan lo haci trabao bon, sin cu a tira un bista riba e contract. Esaki ta cuestiona full e sistema di Parlamento, unda miembronan ta vota pa algo sin mira e documento.
Comerciantenan Uni a describi e debatenan den Parlamento como un ‘wega’ y no a handle e topico. Esey ta hopi preocupante, pasobra e transpariencia sigur no tey.
A bisa cu Gobierno lo no hinca ni 1 Florin den dje, y cu tin hopi hende local lo haya trabao. Pero segun Ponson, tanten cu Parlamentarionan of pueblo no haya e contract pa mira, no por duna ningun comentario riba e aspecto aki.
“Con por bisa cu e deal aki ta hopi bon, siendo cu bo no a mira e contract?” Esey tabata e pregunta di Ponson. Den mesun rosea el a bisa: “Con bo por bisa cu e deal ta malo, sin cu bo ta mir’e?”
Tur negoshi tey pa gana placa, pero e mihor pregunta ta: Bo a haya e mihor deal?
Comerciantenan Uni ta keda insisti cu tabata hopi inhusto pa pueblo, cu WEB Aruba NV a cera un deal pa 20 aña largo cu un suministrador di combustible, sin cu pueblo a haya chens di mira con e contract ta hinca den otro. Pakico tanto secrecia? Pakico e prijsnan no ta poni riba mesa?
“Ami como comerciante no por pone hamas un firma, tanten cu mi no a lesa e documento,” Frans Ponson a bisa. Nan no por compronde con Parlamento a aproba esaki, sin cu a haya chens di lesa nada di e contract.
