Situacion mundial cada rato ta bira mas serio den tur sector
*Sindicatonan di Gobierno tin deber di ta honesto cu nan pais
*Recesion mundial parti di incertidumbre internacional historico
ORANJESTAD(AAN)- “Con sindicalistanan cu mester ta conoci cu e situacion mundial sumamente preocupante, awor kier pa Gobierno aumenta su gastonan y paga pa revocacion di porcentahe di salario?”
Esaki ta e punto cu ta bini dilanti cerca tur informante experto cu DIARIO a acerca riba e menasa nobo cu sindicatonan di Gobierno ta pone riba cabez di Aruba.
Informantenan di DIARIO no por deshaci di e pensamento cu actualmente weganan politico ta wordo hunga cu Aruba mientras situacion mundial ta empeora y e pronosticonan pa 2023 ta bira cada rato mas dificil.
“Aruba mester ta sumamente contento cu ainda e no ta sinti e peso total cu paisnan grandi ta experencia y cu ta marca historia mundial. Expertonan y instancianan mundial di renombre tin problema pa bisa awe kico lo spera mundo na 2023,” a bini dilanti.
E panorama mundial actual ta di preocupacion grandi mientras e guera na Ukraine ta continua y den tur sector problema ta wordo registra.
“Na e momentonan aki podernan economico mundial ta tembla. Con Aruba por papia di aumento di su gastonan di Gobierno, cu ainda mester atende cu Hulanda riba e pago cu a wordo haci di e 5 porciento?”
Segun informantenan ta un berguensa cu hustamente e sindicatonan di Gobierno, cu ta instancianan cu tin tur informacion di e pais, ta crea intrankilidad y ta dirigi nan miembronan den direccion di accionnan, cu lo ta devastador pa bienestar di Aruba, cu te awor no a sinti e peso grandi cu ainda ta na caminda.
“Trahadornan ta wordo manipula dor di sindicatonan cu na nan turno ta wordo manipula dor di infiltrantenan politico, cu tin un solo meta na bista cu ta poder. Nan no ta mira cu e intrankilidad cu nan ta causa na Aruba na e momentonan aki, por tin resultado destructivo pa e pais, cu a conoce un recuperacion economico mientras paisnan grandi ta na careda,” a wordo treci dilanti.
Sector petrolero mundial a bira un carousel. Prijsnan di energia na Europa ta desastroso den un inseguridad internacional.
Na Ukraine guera ta alcansa proporcionnan serio cu resultado pa realidad mundial.
E menasa grandi di hamber y miseria, di desempleo grandi cu por bira realidad na tur pais mientras sector comercial mundial ta pasa den problema serio, ta e berdad grandi cu mester tene na bista.
“Con Aruba, cu un debe nacional enome cu ta haci e pais cualifica pa e grupo mas adverti dor di Fondo Monetario Internacional, mester paga mas placa na trahadornan di gobierno na e momento aki?” informantenan a trece dilanti.
“Na 2020 Covid-19 a duna prueba kico por pasa si economia basha abou. 2023 te awor ta wordo mira como aña di recesion den un situacion mundial, cu ta sigui empeora,” ta e realidad cu ta wordo presenta.
Tur experto mundial ta sigui insisti cu cantidad di pais (incluyendo Merca) ya ta den recesion y ta adverti cu e recesion mundial lo ta hecho na inicio di 2023.
Kico esaki lo nifica pa Aruba, ta un pregunta cu ta haci cu Gobierno mester evita cu Aruba ta cay den problema mucho mas serio sin cu medidanan a wordo tuma.
Kico lo pasa si recesion afecta turismo? Cuanto conferencia ya ta tuma lugar pa prepara paisnan pa e realidad amargo cu por ta sconde tras di 2023?
Informantenan clave ta mustra cu intrankilidad laboral den Gobierno na e momentonan aki lo ta fatal pa Aruba.
“E caha di placa di Aruba no ta di Gobierno pero di Pueblo,” ta bini dilanti. Gobierno no por duna su empleadornan beneficio na un momento cu tur trahador di Aruba y di mundo ta core riesgonan dor di e situacion insigur mundial.
E hecho cu sindicatonan ta exigi e pago di “reparatietoeslag” di alrededor di 2000 Florin na final di Augustus 2022 ta algo inaceptabel pa informantenan cu ta mustra cu Gobierno di Aruba tin e deber di ta cauteloso pasobra si e situacion mundial sigui empeora, Aruba tambe lo ta den problema sumamente grandi, sigur teniendo na cuenta cu e temporada halto di turismo ta cuminsa na momento cu recesion mester culmina na Merca y Europa segun expertonan.
