Splica e sindicatonan cu Aruba mester paga debe orguyosamente
*E poder peligroso di lidernan sindical di trahador di Gobierno
ORANJESTAD(AAN)- No tin poder mas peligroso cu poder di lidernan sindical di trahadornan di Gobierno, cu na mayoria di paisnan democratico ta ricibi nan salario di saco di nan miembronan cu ta traha den servicio di Gobierno cu ta nifica cu nan ta den servicio di Pueblo.
Awe sindicalistanan di Gobierno atrobe kier hinca Aruba den suspenso pasobra nan kier pa den e situacion mundial sumamente dificil, Gobierno di Aruba pone placa cu Aruba no tin riba mesa.
Nos a spera e problema presenta si sigui loke tabata bini dilanti den seno di e partido politico, dirigi pa e dirigente politico cu a marca historia di Aruba, cu ta Mike Eman.
Awe trahadornan di Gobierno ta wordo dirigi den e direccion di accion pa nan exigi placa, cu ta conoci cu ta dificil pa Aruba paga na e momentonan aki.
Dificil no solamente pasobra tabata tin un pandemia sigui pa un guera practicamente mundial y un sector petrolero mundial cu a hinca henter mundo den agonia.
E problema grandi di Aruba ta, cu e pais a wordo hinca den un desastre financiero dor di Mike Eman, cu a bisa cu su Gobierno ta crea debe, cu Aruba orguyosamente lo paga.
Na mes momento pa e haya mas voto, Mike Eman a dicidi di baha entrada di Aruba cu su wega politico di mitar BBO, cu e tabata na haltura cu lo spart futuro di Aruba for di otro.
Na e momentonan aki nos ta kere cu si e sindicalistanan di Gobierno ta sincero, nan ta pidi Mike Eman pa pone placa riba mesa.
Loke ta pasa na Aruba na e momentonan aki, no ta duna prueba di responsabilidad sindical pero mas bien ta duna prueba cu ta trata di uza trahadornan di Gobierno pa sembra problema politico, cu lo ta beneficioso pa Mike Eman y su anhelo pa ta lider eterno di Aruba.
Si Mike kier yuda Aruba, e ta cuminsa admiti con el a bay laga e caha di placa di Aruba cu a bira mendigo den Reino, manera Raymond Knops a trece dilanti.
Mike Eman ta responsabel pa loke ta pasa Aruba na e momentonan aki.
Sindicatonan cu a sostene Mike Eman na momento cu Gobierno Hulandes a baha Mike Eman for di Fort Zoutman, awe mester bay pidi cuenta y razon pa e debe cu el a laga atras pa Aruba cu ta den problema serio awe.
Intrankilidad laboral na Aruba na e momentonan aki ta sumamente peligroso pa e pais, cu mester tene cuenta cu e situacion mundial ya cu turismo ta depende di loke ta pasa na mundo.
Ta tristo cu awe forsanan politico ta trata na uza personal di Gobiernol pa causa problema serio pa Aruba.
Na 2017 despues di su derota, Mike Eman a bay cera su mes den un cashi for di cual e no a sali te na momento cu Evelyn Wever-Croes a pone Aruba riba un rumbo nobo.
Si sindicalistanan awe ta kere cu Mike Eman mester ta semper na poder na Aruba nan mester sigui loke Mike Eman a splica nan ora Mike Eman a destrui Aruba cu debe nacional y tur e gastonan cu el a laga pa Aruba paga.
Awe sindicalistanan mester puntra Mike Eman con ta e mihor manera pa orguyosamente nan paga tur e debenan di Aruba cu Mike a crea, manera Mike a bisa cu nan lo haci ora el a pusha Aruba den desastre y casi a zink Florin!
