Segun Rino Hermans di CMO:
- Desde 2016 no a experencia un awacero torencial pa evalua e plannan di mitigacion
ORANJESTAD (AAN): Despues di e awasero fuerte di aña 2016, Crisis Management Office (CMO), cu e tempo ey tabata conoci como Bureau Rampenbestrijding (BRA), a tuma diferente medida di mitigacion pa atende e situacion. Segun director di CMO, señor Rino Hermans, desde e fecha ey Aruba no a experencia un awasero torencial di mesun magnitud pa por evalua si e plannan di mitigacion realmente ta funciona.
Sinembargo, señor Hermans a enfatisa cu no por bisa cu Aruba ta completamente liber di peligro. Den e ultimo 10 aña, Aruba a ricibi 4 ‘watch’ y ‘warnings’ for di Hurricane Center. E cambio climatico ta mustra cu e patron di horcannan ta cambiando, cu nan ta move mas pa zuid compara cu antes, cu nan tabata pasa mas pa nort y oost.
Segun Hermans, Aruba mester keda prepara. Aruba no mester haya e wowo di un horcan riba nos pa crea un situacion critico. Solamente awa torencial por pone Aruba den un posicion precario, manera a sosode na aña 2004 y 2016. Segun Hermans, esaki ta ripiti cada 10 pa 12 aña, y awo Aruba ta 10 aña despues di e ultimo awasero torencial grandi.
Señor Hermans a indica cu CMO ta sigui prepara activamente. Ya a reuni cu tur departamento y instancianan concerni pa revisa y evalua e plannan existente pa e temporada di horcan. “Nos ta spera cu Aruba no wordo afecta gravemente, sino cu solamente nos haya un tiki awa pa refresca di e calor,” Hermans a expresa.
Tocante e barionan cu den pasado a haya mas impacto durante awaseronan fuerte, manera Pos Chikito, Zeewijk, Madiki y Palm Beach, Hermans a splica cu desde e ultimo awasero torencial na 2016, no a bin un situacion suficientemente fuerte pa test e sistemanan cu CMO a implementa, particularmente na Palm Beach. El a agrega cu entretanto e areanan aki a cambia considerablemente den terminnan di populacion y infrastructura, cu mas casnan y negoshinan a wordo construi. A pesar di esaki, e areanan aki ainda ta identifica den e risico kaart di CMO.
Tambe el a señala cu Bubali Plas ta cumpli un rol importante den opvang di awa di yobida. Durante awasero fuerte, mester mantene Bubali Plas habri y limpi pa e por capta e exceso di awa y asina yuda preveni inundacionnan na diferente parti di Aruba.
“E plan ta cla y nos ta sigui traha riba dje. Nos tin experiencia cu e maneho di e tipo di situacionnan aki, aunke nan no ta sosode frecuentemente. Hopi no a cambia, pero CMO ta sigui actualisa su risico kaart tumando na cuenta tur e cambionan den infrastructura y populacion,” señor Hermans a conclui.
