Miembro di Conseho Municipal di Den Haag lo kier a mata Rutte --- *Welga historico den shete hospital di universidad pa mas placa ---*Formacion di Gobierno Hulandes mal pega den situacion tenso
ORANJESTAD (AAN) — Hulanda lo bay di acuerdo cu e posicion logico di Aruba cu na e momentonan aki, Aruba no por baha su gastonan di cuido medico?
E pregunta aki mester haya un contesta actualmente.
Prome Ministro Evelyn Wever-Croes cu rason ta indica cu esaki ta e momento mas inoportuno y iresponsabel, pa Aruba papia di baha gasto di Cuido Medico cu ta depende di loke Covid-19 ainda mester haci y resultadonan medico di e pandemia.
Te awor mundo no por bisa cu e por haya un forma pa deshaci di Covid-19. Ainda expertonan ta spiera pa variantenan nobo mientras cada caso cu presenta di e malesa, mester duna mas splicacion di loke por spera den un futuro desconoci.
Hulanda ta insisti cu mester baha gasto. Hulanda cu ainda ta wordo representa dor di e Ministro di Asuntonan di Interior y Relacionnan den Reino, Raymond Knops, cu ainda ta Ministro pa e simpel hecho cu Hulanda tin problema serio pa forma un Gobierno nobo.
Pa analisa e posbilidad cu Hulanda lo bay di acuerdo cu Aruba den un asunto mas cla cu luz di dia, mester mira e situacion politico desastroso cu e Gobierno di Mark Rutte conoce actualmente.
Despues di eleccion, Evelyn Wever-Croes a logra forma Gabinete Wever-Croes 2.
Mark Rutte, cu a dirigi e partido cu a bolbe gana eleccion na forma absoluto, ainda no a wordo huramenta como Prome Ministro Hulandes pa un periodo mas pa un simpe motibo.
E situacion politico na Hulanda ta un desaster total.
Si na e momentonan aki Rutte, cu of sin Raymond Knops mester bisa Pueblo Hulandes cu Evelyn Wever-Croes a gana e bataya contra Gobierno Hulandes, Rutte sigur mester subi su bicicleta y bay sconde pa su votadornan.
E hecho cu e mester a sconde e siman aki, ya ta prueba di seriedad di e situacion na Hulanda caminda Arnoud van Doorn a bira sospechoso.
Van Doorn ta miembro di e Conseho Municipal di Den Haag y ta wordo sospecha di ta tras di un atentado contra Rutte cu tabata den necesidad di mas vigilancia durante siman cu a termina.
Mientrastanto e representante di trahadornan den Cuido, tambe a dicidi pa un welga historico na Hulanda cu lo wordo ripiti dia 26 di October si Rutte no dicidi di pone mas placa riba mesa pa personal di Cuido.
Ayera na shete di e Hospitalnan mara na Universidad na Hulanda, a conoce welga di personal den Cuido, cu ta nenga e loke Rutte kier pone riba mesa como pago.
Pues otro problema pa Rutte, mientras e Formador di turno, cu lo mester a logra loke cantidad di otro Formador na 2021 no a logra, cu ta formacion e Gobierno nobo di Rutte, practicamente a tira serbete den ring.
Hasta un Gobierno cu sosten minoritario no a resulta posibel. Awor ta trata na yega na un gobierno cu tin aparencia di un gobierno di expertonan, un asina yama “zakencabinet”.
Aunke Gobierno Rutte a deshaci di e medidanan mas pisa di Covid-19, ainda e situacion Hulandes ta uno sumamente peligroso pa decisionnan politico, cu Pueblo di Hulanda lo no considera como gustoso.
E ambiente politico na Hulanda pues ta e problema mas grandi pa Aruba negocia asuntonan favorabel y hasta logico pa Aruba.
Un realidad cu Aruba mester tene na bista. Un realidad di un gabinete demisionario di Rutte, cu no por paga cu su boto riba baranca na costa politico di Aruba.
