ORANJESTAD (AAN): Diamars mainta director di AZV, Ir. Edwin Jacobs a felicita Minister Dangui Oduber pa firma decreto pa e prome dos profesionalnan wordo incorpora den e registro di AruBig.
Jacobs a indica cu esaki ta pone un base pa un mihor calidad den sector di cuido.
Jacobs a bisa cu 20 aña pasa a introduci AZV, den e ley di AZV ta explicitamente formula cu un di e metanan di AZV ta pa stimula y percura pa tin un cuido accesible pa aseguradonan, un sector di cuido cu ta traha eficas y calidad.
Cu introduccion di AruBig, mara na dje ta instituto di calidad, ta formaliza pa prome biaha den historia di cuido na Aruba, e parti di calidad. Esaki lo duna mas confianza na tur asegurado ora nan ta acudi na dunadornan di cuido.
Como AZV, tin algun tempo caba cu nan ta expresa nan preocupacion pa cu e sostenibilidad di e seguro den futuro. Segun Jacobs, esaki ta nifica sostenibilidad financiero den sentido cu e demanda pa cuido ta bay aumenta den proximo añanan, impulsa pa embiehecimento di e poblacion y manifestacionnan di malesanan cronico, cu pa paga esaki lo ta un reto grandi.
Loke nan no ta bisa hopi, pero si ta preocupante y tin nan atencion, ta e sostenibilidad di personal. E demanda di cuido ta bay crece asina hopi, cu ta bay ta necesario pa tin mas profesionalnan pa por atende e demanda di cuido. Ja caba tin falta di profesionalnan, y no solamente na Aruba, pero otro paisnan den Occidente cu ta conoce enbiehecimento, tin e problema aki. Paisnan manera Alemania ta buscando profesional y specialista hasta na Mexico y Colombia, pa asina bay reforza nan cuido.
E rapport di Conseho Cientifico pa Maneho di Gobierno di Hulanda di 15 di september ultimo, nan a señala na Gobierno Hulandes pa pone mas atencion na maneho di recluta profesionalnan den extranheria pa por cumpli cu e demanda di cuido di poblacion hulandes.
Na Aruba tambe ta bay yega e momento cu mester hisa nos bista y wak mas leu cu solamente Europa.
Segun Jacobs, cu AruBig ta duna e confiansa cu e base ta poni pa asina yiunan di tera cu ta studia den e region y cu por specializa den e region por regresa nan pais y duna nan contribucion na e reto di salud den añanan dilanti, y por bira un instrumento pa por atrae otro specialistanan cu ta dificil di haya, pero cu si ta den e region y por brinda nan servicio na poblacion y sigur garantiza un cuido di calidad.
Jacobs a enfatiza cu esaki ta un momento historico pa sector di cuido y sigur ta felicita Minister Oduber pa su vision pa sector di cuido.
Di parti di SVb, Jacobs a felicita reconocimento di specialismo Arts voor Arbeid & Gezondheid Aruba, y proximamente nan ta den deliberacion cu NSPOH pa specializacion di Arts Beleid en Maatschappij pa docternan na AZV, pa asina nan tambe por sigui bay mas den e direccion aki.
