Minister Dangui Oduber
ORANJESTAD (AAN): Diaranson ultimo tabata un dia historico pa Aruba caminda DVG atraves di nan departamento di Kwaliteitsinstituut a firma un “letter of intent” cu e compania Prelum di Hulanda.
E acuerdo aki ta pa facilita e dokternan di cas y otro gruponan cu ta forma parti di e prome linea di cuido na Aruba. Pa mantene nan conocemento di e materia y haya nan acreditacionnan necesario pa nan registracion como dokter di cas.
E compania Prelum lo ta trahando hopi di cerca cu e Kwaliteits Instituut Aruba. Un paso hopi importante den mehoracion di e prome linea di cuido aki na Aruba.
Cu e acuerdo aki dokternan di cas por bay haci uzo di e E-plataforma di Prelum cu lo wordo diseña specialmente pa Aruba. Nan por sigui cursonan medico via e plataforma cu ta un e-learning, es decir via un forma digital. Di e manera aki nos dokternan ta keda den actualisacion di tur novedad den e mundo medico y ricibi tur nan acreditacionnan necesario.
Segun Minister Oduber e acuerdo lo contribui pa e dokternan traha na un manera mas eficiente y ta pas den e vision di ministerio pa stimula innovacion, pa asina aumenta e eficiencia y calidad den cuido.
E ta algo hopi importante cu a logra pa nos dokternan di cas cu lo contribui grandemente na reduccion di gastonan y mehoracion di e calidad di cuido cu ta ser brinda na nos comunidad.
E plataforma aki lo ta un cuminsamento pa e tipo di e-learning aki e lo por wordo expande den futuro pa otro grupo di cuido medico, e mandatario ta finalisa bisando.
