Ministro Glenbert Croes papiando riba Ecuador
ORANJESTAD (AAN): Diabierna awor, Minister di Energia sr. Glenbert Croes hunto cu sr Edison Briesen, presidente di hunta di comisario di RDA lo sali pa Ecuador pa reuni cu e gobierno di Ecuador y e compania nacional di petroleo di Ecuador, PetroEcuador.
E meta di e reunion aki ta pa yega na un acuerdo entre e gobiernonan pa asina Aruba por bin na remarca pa cumpra HFO na un prijs mas barata cu lo por resulta den un reduccion di awa y coriente na Aruba.
Manera ta conoci, esfuerzonan a worde haci caba na Washington, na unda cu Minister Glenbert Croes hunto cu Minister Plenipotenciario señora Joselin Croes a reuni cu representantenan di Embahada di Ecuador.
Minister Glenbert Croes tambe ta gradici Minister President Evelyn Wever-Croes cu durante su reunionnan na Peru, a reuni cu secretario di estado sr. Anthony Blinken pa informa e gobierno mericano riba e importancia pa Aruba ricibi e apoyo pa cu e solicitud aki.
E situacion actual na Aruba no ta uno facil. Tin varios persona cu ya a remarca cu nan awa y coriente a subi substancialmente. Pa cu esaki, Minister Glenbert Croes a traves di e director di Utilities, a solicita pa e companianan estatal Web y ELMAR mantene nan “help desk” disponibel y accesibel pa duna pueblo splicacion, pa check den caso di coreccion y pa tene cuenta cu e capacidad di pago di tur famia.
Gobierno ta haciendo su maximo esfuerso pa logra haya e prijs di HFO mas economico pa asina por baha prijs di awa y coriente. E prome meta ta pa yega na un acuerdo specifico cu PetroEcuador na unda Fuel Marketing Supply Aruba (FMSA), lo ta esun encarga cu e transaccion aki. Ta bon pa remarca cu Ecuador ta sumamente impresiona cu e “National Energy Policy” y e “Transition Road Map” cu Aruba ta encaminando y ta desea di por yega na un cooperacion energetico entre Aruba y Ecuador.
Na e momento aki tin un contract vigente entre RDA, FMSA y e proveedor actual di HFO. E problema ta cu Aruba ta cumprando actualmente HFO na un prijs caro cual ta afectando e prijs di awa y coriente. Si Aruba por logra haya un descuento substancial, lo baha e prijs di awa y coriente dunando pueblo asina e alivio cu tanto nan ta desea. “Si tin algo cu nos por haci pa alivia nos pueblo, nos comunidad y nos economia ta nos deber di hacie.” Minister Glenbert Croes a expresa.
