Barco Zr.Ms. Groningen a regresa Hulanda
ORANJESTAD (AAN): E barco patruyero Zr.Ms. Groningen ta regresando e siman aki bek na waf di Den Helder na Hulanda. E barco di marina por tira un bista atras pa cu un exitoso periodo di trabao den Lama Caribe.
Nunca antes un ‘stationschip’ den Caribe a yuda captura asina hopi droga. E barco Groningen a keda mitar aña den Caribe, y aki a logra di intercepta 17 speedboat riba lama, y hunto a confisca un total di 19.000 kilo di droga.
Marina Hulandes semper tin un stationschip den Caribe cu e.o. ta wordo usa pa operacionnan anti-droga, anti-traficacion humano, pa search and rescue, y yudanza durante desastrenan di naturaleza, manera temblor y destruccion causa pa Horcan.
E stationschip por wordo usa riba lama tanto door di Wardacosta di Caribe Hulandes como tambe e Joint Interagency Task Force South crea door di Mericanonan.
Aunke cu e barco Zr.Ms. Groningen pa gran parti tabata disponible pa diferente tarea, mayoria di e resultadonan a wordo logra riba tereno di traficacion di droga. Nunca antes un barco di marina Hulandes a intercepta asina hopi droga durante nan periodo di trabao den Caribe.
E 17 botonan cu nan a intercepta, a yuda nan captura 15.600 kilo di cociana, y 3.500 kilo di marihuana. Marina Real ta traha den e region cu varios pais hunto den e operacionnan anti-droga.
Awor e barco ruman di dje, esta Zr.Ms. Holland lo ta patruyando den Caribe.
