ORANJESTAD (AAN): Universidad di Aruba (UA) ta bay organiza un asina yama OGM Conference y relaciona cu esaki DIARIO a entrevista rector interino di UA, Sue-Ann Lee.
El a splica cu OGM ta e programa Organization Governance & Management cu ta cay bao di e facultad di Arte.
“OGM ta bay cumpli 15 aña e aña aki como parti di comunidad, pues nos kier trece dilanti tambe kico tur OGM a representa durante e ultimo 15 añanan, pero na mes momento tambe lo presenta kico ta e plannan pa futuro, pa asina tambe por comparti cu comunidad no solamente e programa di estudio, sino tambe e importancia di tin un programa asina na Aruba di governance, na unda e impacto pa nos comunidad ta”, segun Lee.
El a sigui bisa cu Governance ta e parti di maneho cu ta algo hopi importante y ta algo cu ta desaroyando continuamente.
E rector interino a indica cu esaki lo ta e topico central cu e oradornan invita lo tin.
“Ta importante tambe pa para keto y wak nos Universidad cu tin varios decada di existencia, pero esaki ta mustra tambe cu OGM ta un programa madura”.
Diez cinco aña di trayectoria ta largo, pues e tin un stabilidad aworaki pa sigui desaroya mas pa nos comunidad.
Esey tambe ta mustra bek den nos alumnonan cu ta akinan y tambe cuanto studiante nos a gradua den ultimo añanan, unda nan ta awor den comunidad di Aruba, kico nan a haci y con nan sigui, pues e ta hopi importante pa mustra nos contribucion na Aruba y con nos ta sigui contribui como universidad, segun Lee.
E conferencia ta bay ta na Universidad di Aruba riba 18 y 19 di Februari.
