ASTEC ta anuncia ahuste di tarifa pa baha y stiwa container riba waf

Nan tin cuatro aña sin ahusta tarifa

ORANJESTAD (AAN): Recientemente Aruba Stevedoring Company N.V., conoci popularmente como ASTEC y Aruba Ports Authority N.V. (APA) a acorda pa ahusta e tarifa pa baha y stiwa carga riba barco. E ultimo biaha cu a ahusta e tarifa tabata na aña 2018, pues durante e ultimo añanan hopi gasto a aumenta y ASTEC a logra absorba tur.

            Awor a yega na un punto, cu despues di cinco aña, mester haci un adaptacion chikito pa por sigui ofrece e mesun nivel di servicio, cumpli cu e plannan di mantencion di e facilidad y cumpli cu e rekisitonan di siguridad di nos waf. 

   E ahuste: ASTEC a manda un carta pa su clientenan, local y internacional, den cual e ta anuncia cu e buki di tarifa pa aña 2023 a sali y cu e ahustenan den dje ta drenta na vigor entrante dia 1 di januari 2023. Den e tarifa nobo, a inclui un ahuste den e servicio riba waf di stiwado, den cual por nota un aumento chikito di solamente 4,09%.

   E acuerdo entre APA y ASTEC:  ASTEC y APA tin un contrato di duracion largo pa operacion di waf di carga na Aruba. E inversion total na waf di Barcadera tabata rond di 100 miyon Florin, di cual ASTEC a pone rond di 53% y APA a pone rond di 47%. Naturalmente ta un concesion di Gobierno caminda sector priva y sector publico ta uni y inverti pa sirbi un meta comun pa comunidad y pa tal motibo e reparticion di resultado final di e operacion aki ta bay 69% pa APA, 15% ta bay pa ASTEC y 16% ta bay pa Gobierno (via impuestonan den forma di winstbelasting y primanan social).

   E parti di APA ta sali for di entrada bruto di servicionan, mientras cu e parti di ASTEC ta sali for di entrada netto (despues di kita gasto di personal, operacion, siguridad, financiamento, belasting y mantencion). ASTEC y APA ta mara na e condicionnan di e contrato vigente, caminda cu e tarifanan y marco di ahuste ta bon stipula pa percura pa e proyecto ta sostenibel y di a largo plaso.

  APA ta controla ASTEC anualmente: Anualmente APA ta controla resultado di maneho di e waf di Barcadera y su operacion door di gerencia di ASTEC pa sigura bon maneho y transparencia. Ademas, anualmente un accountant externo ta controla ASTEC pa garantisa cumplimento cu tur standard administrativo y contractual. Tambe ta controla ASTEC riba aspectonan di siguridad portuario/maritimo via instancianan gubernamental, pa salbaguardia siguridad na frontera engeneral.

   Mas siguridad: Tempo cu ASTEC a firma contract cu APA pa maneha waf di carga, tabatin 9 miembro di siguridad, combina cu hopi camara y sistema moderno digitalisa. Cu desaroyonan internacional, banda di cambio di ley maritimo, a haci cu awendia mester a emplea mas personal di siguridad. Awendia tin como 20 personal di siguridad trahando riba waf, cu a traduci den un aumento drastico den gasto di personal.

   Inversion den mantencion: Den e acuerdo entre APA y ASTEC ta stipula cu ASTEC mester percura pa mantencion di e facilidad y di e ekiponan riba tereno di waf. Por imagina cu uzando e ekiponan tur dia, ta pone cu e agenda di mantencion mester ta hopi activo. Sin lubida e daño cu salpeter y e demas aspectonan ambiental den e aire den area industrial di Barcadera ta haci na e facilidad y e ekiponan eynan. ASTEC tin un plan bon hinca den otro di mantencion, pero cu tur e aumento di otro gasto, a pone cu mester ahusta tarifa pa por ehecuta e trabaonan di mantencion.

   Waf di Aruba ta mas economico: Ora analisa operacion di ASTEC na Barcadera, por conclui cu, compara cu otro wafnan den region, cu ASTEC ta mas eficiente y efectivo den su operacion y costo. Es mas, e costonan total na ASTEC pa baha y procesa container ta mas economico cu tur e islanan den region.

   ASTEC ta un compania di ocho doño: ASTEC N.V. ta un empresa Arubiano cu 8 accionista cu originalmente tabata activo den ramo di stiwado na waf di Playa, cu na september 1983 a combina y bira un empresa. Anualmente ta descarga o procesa un promedio di 350 barco di carga y 125 barkito. ASTEC N.V. ta partner cu APA N.V. den construccion, financiamento, operacion y mantencion di e terminal di waf di carga situa na Barcadera.