Gobierno a tuma e prome paso pa mitiga escasez di trahado, pero falta  ainda

Camara di Comercio mustra cu:

ORANJESTAD (AAN):  Desde comienso di aña caba Camara di Comercio y Industria di Aruba (KvK) a trece diferente topico importante den prensa y tabatin diferente reunionnan cu Gobierno encuanto topiconan importante y actual, incluyendo e scarcedad di trahado. KvK tambe a conduci un encuesta debi na e situacion alarmante di nos mercado laboral caminda cu no tin suficiente trahado pa cubri e cuponan di trabou cu tin disponibel. A propone solucionnan concreto na Gobierno ya cu a premira cu e situacion lo bira mas dificil ainda. Pa KvK, ta fundamental cu Gobierno a reconoce e urgencia di e situacion y ta aplaudi cu a tuma accion, pero mester tuma mas medidanan pa por yega na un alivio real.

   Encuesta: Recientemente, den un encuesta tocante e posibel scarcedad di trahado na Aruba, KvK por a conclui un biaha mas cu no tin suficiente trahado pa cubri e cuponan di trabou cu tin disponibel actualmente na Aruba. KvK ta e prome pa lansa un encuesta pa evalua e situacion real den nos mercado laboral na unda KvK a consulta e mercado laboral, y basa riba e contestanan y sugerencianan, KvK a trece e resultadonan dilanti. E encuesta aki a mustra claramente cu tin scarcedad di trahado den varios sectornan na Aruba. E analisis cu KvK a haci a base di e encuesta a wordo comparti riba social media y e resultadonan a wordo uza tambe durante varios negociacionan cu Gobierno.

   “Beleidsinstructie”: Basa riba e desaroyonan economico, e  recomendacionnan y e necesidad di trahadonan riba e mercado laboral, Minister di Labor, Energia & Integracion, sr. Glenbert Croes, a anuncia instruccionnan nobo den e maneho di permiso pa estadia y permiso di trabou temporario (“Beleidsinstructie”) cu ta vigente desde 1 augustus 2024. Cu esaki ta adapta e “Toelatingsbeleid” manera ta defini den e “Toelatingshandboek 2023” riba diferente puntonan. Varios punto importante cu a wordo sugeri na Gobierno den colaboracion cu KvK, ATIA, AHATA y CUA a wordo incorpora den e instruccion, algo sumamento positivo.

   Positivo, pero alerto: KvK ta aplaudi Gobierno di Aruba pa implementacion di e “Beleidsinstructie” cu ta un paso importante pa mitiga e problema di scarsedad di trahado cu Aruba ta enfrentando. E scarcedad aki di trahado ta den tur sector economico y ta un menasa serio pa e stabilidad economico di nos pais ya cu no tin suficiente hende local pa reemplasa esnan cu ta sali for di mercado laboral pasobra nan a yega edad di pensioen. Esaki debi cu e grupo cu lo sali cu pensioen ta hopi mas grandi cu e grupo chikito cu lo tey pa reemplasa nan, causa pa un caida fuerte den nacimento den e ultimo decadanan. A pesar cu nos ta aprecia e esfuerso di Gobierno, KvK ta desea di enfatisa cu nos ta keda alerto y critico, pasobra nos ta consciente cu e instruccion aki solamente no lo soluciona e problema den su totalidad. E scarcedad di trahado ta un situacion compleho na unda hopi medida pareu ta necesario pa bin na un solucion sostenibel.

   KvK lo sigui boga pa e colaboracion entre Gobierno y sector priva, pa asina por haya solucionnan efectivo pa mitiga e falta di trahado y fortalece nos economia.