Gobierno a ripara cu lidernan Sindical ta satisfecho cu acuerdo di Indexering

Na momento di firmamento di e acuerdo pa indexering 2018-2023

ORANJESTAD (AAN): Dialuna merdia, durante conferencia di prensa di Gobierno di Aruba, lider sindical di SADA, señor Edward Maduro a compaña Prome Minister Evelyn Wever-Croes pa asina duna empleadonan publico y "gelijkgestelden" e grato notica cu Gobierno di Aruba y miembronan sindical a firma e acuerdo pa loke ta e tema di indexering pa aña 2018 pa 2023.

   Señor Maduro a indica cu desde Januari caba Gobierno y sindicatonan tabata den negociacion y reunionnan intenso pa cu e tema aki, mirando cu na 2019 a cuminsa papia riba e inflacion di 2018. Desafortunadamente e negociacionnan aki a tranca na final di 2019, y a bay riba un "hold" na momento cu pandemia a dal.

   E tabata un tempo largo prome cu a inicia e negociacionnan aki back, pero mirando e necesidad di empleadonan publico pa logra un ahustacion riba nan salario, sindicatonan a uni y a acerca Prome Minister pa haya su atencion pa cu e tema aki. Despues di negociacion y reunionnan intenso a logra yega na un acuerdo den beneficio di empleadonan publico y "gelijkgestelden". Cada sindicato a acerca nan "achterbaan" na nan manera, pero e resultado final ta den liña cu locual e empleadonan publico tabata kier a wak, cu ta un compensacion pa e perdida di forsa di compra.

   Señor Maduro a splica cu nan como sindicato ta consciente cu costo di bida ta halto, debi na inflacion y cu esaki a afecta tur trahado. P’esey ahustacion di salario tabata necesario pa asina tur hende por sigui contribui na e economia di pais Aruba. Como lider sindical, nan a wak e necesidad di nan miembronan y mirando cu nan ta e orea y voz di cada un di e empleadonan, tabata nan deber di yega cerca nan doño di trabao pa purba na yega na un solucion.

   Apesar cu Gobierno tin e rol di goberna un pais, e tin e rol tambe di dunado di trabao. Aki ta unda lidernan sindical a acerca Prome Minister cu na su turno a duna nan oido, y sinta negocia na un manera profesional y cu respet pa purba yega na un solucion. E acuerdo aki ta uno historico, y empleadonan por confia cu nan directiva a haci un trabao profesional sin cu mester a yega na e punto drastico di bay den accion. No ta tur biaha tur hende lo keda contento cu e resultado, pero lidernan sindical ta satisfecho cu e logro aki pa nan miembronan.

   Señor Maduro, den nomber di sindicatonan ta felicita tur empleado publico y "gelijkgestelden" cu e gran logro aki. Tambe ta gradici Prome Minister pa duna nan e oido pa por a yega na e acuerdo aki, y señor Orlando Senchi cu semper tabata disponibel pa yuda na momento cu lidernan sindical tabata tin mester cualkier informacion. Por ultimo tambe ta duna danki na Conseho di Ministro, y tur e profesionalnan cu tabata presente durante e reunionnan. "Nos ta contento cu awe nos ta sinta cu 6 aña tras di lomba cu a worde ahusta, y awor lo percura pa sigui traha riba e tema aki pa no tin un atraso mas di tanto aña dado caso tin inflacion", señor Maduro a expresa.