Gobierno a reuni cu Secretario di Estado di Husticia y Seguridad Eric Van Der Burg

Minister Rocco Tjon:

ORANJESTAD (AAN): Diamars merdia, Minister di Husticia y Asuntonan Social sr. Rocco Tjon, hunto cu Coleganan Minister President sra. Evelyn Wever-Croes y Minister di Labor, Integracion y Energia sr. Glenbert Croes a reuni cu Secretario di Estado di Husticia y Siguridad Sr. Eric van der Burg. Mirando cu e topico di extranheria ta toca diferente faceta, y ta resorta bou di diferente Ministerionan a scoge pa  reuni den e constelacion aki.

   A papia entre otro e “bestedingsplan” di e cadena di extranheria, e reapertura di frontera cu Venezuela y posibel colaboracionnan pa futuro. Un reunion sumamente positivo caminda a dialoga riba e cooperacion cu ta hayando di parti di hulanda den cuadro di asilo, aspectonan di migracion y inmigracion pa loke ta control di nos frontera.

   Pa loke ta trata e reapertura di e frontera cu Venezuela, mester bisa cu ambos Gobierno di Aruba como Hulanda ta consciente cu esaki lo wordo habri eventualmente, sin mas, e siguridad di nos frontera y e siguridad riba nos isla ta keda un prioridad. Pues den cuadro di esaki, e “justitieel veiligheidsberaad” ta evaluando e impacto cu esaki lo por tin pa nos isla den cuadro di asilo y siguridad en general, pues ta un topico cu mester wordo miho evalua pa asina bin cu un plan di maneho pa por realisa esaki na su debido tempo.

   Por ultimo, a toca tambe puntonan di posibel colaboracionnan pa e futuro cercano, y aki a papia di aspectonan di detencion y cuido forensico pa detenidonan, pero tambe aspecto pa haya ayudo tecnico riba e parti di asilo. Banda di esaki tambe a papia riba "mensenhandel en mensensmokkel” pues traficacion di hende, y a splica e retonan cu ta wordo confronta cune pa loke ta e TIP-report cu ta wordo emiti door di Merca. E mandatarionan ta wak bek riba un reunion sumamente positivo.