Den cuadro di Good Corporate Governance lo duna transparencia na fondonan y logronan di TPEF

Prome Minister Evelyn Wever-Croes:

ORANJESTAD (AAN): En conexion cu siman di Dia di Turismo, a tuma luga e lansamento oficial di e website di Tourism Product Enhancement Fund (TPEF). Prome Minister Evelyn Wever-Croes tabata presente hunto cu Minister Dangui Oduber, Minister Endy Croes, Minister Xiomara Maduro, Minister Geoffrey Wever, Presidente Suplente di Parlamento Raymond Kamperveen y invitadonan.

   Prome Minister a cuminsa un discurso gradiciendo tur esnan cu for di mainta trempan te anochi laat ta traha pa haci nos pilar economico un exito. Tur nos comerciantenan cu ta inverti hopi den e sector aki pa yuda nos pa por hiba nos pais padilanti. Danki na esaki nos turismo y Aruba ta den recuperacion.

   Prome Minister a mustra e cifranan di turismo di mundo, cu ta 57%, Caribe 82% y Aruba 94%, July > Dec 100%. Esaki sigur ta un exito. “Nos ta bisa tur ora, Aruba ta bendiciona berdad pero no ta esey so ta e motibo di nos exito. E recuperacion aki ta danki na cada un di boso empleado  y comerciante. Masha danki den nomber di Gabinete Wever-Croes. Mi kier gradici tambe mi colega Minister Dangui Oduber pasobra nada ta pasa di su mes. Claro trabou hopi duro, pero bo mester tin e vision y e liderazgo pa obtene e exito aki.

   TPEF ta un otro inovacion den turismo. Y desde awo tin nan website y un logo nobo. Den cuadro di Good Corporate Governance lo duna transparencia na fondonan di comunidad y tur ciudadano tin acceso pa haya sa tocante tur trabao y logro di TPEF durante e ultimo añanan y esnan presente y plannan pa futuro. Tambe ta contene informacion di kico ta e caminda cu un persona of un empresa interesa mester cana pa expresa su interes den un proyecto cu por ta un mehoracion di e producto turistico.

   TPEF ta un fondo cu ta wordo maneha pa profesionalnan riba nan tereno y cu ta personanan cu tin amplio experiencia den turismo y mercadeo. E personanan aki ta personanan cu a dedica gran parti di nan bida na turismo pasobra nan ta kere fuertemente cu Aruba mester tin un luga unico den e mundo di turismo. Nan conoce e producto Aruba cu tur luho di detaye. Nan sa exactamente kico ta nos puntonan fuerte, pero mas importante ainda, kico ta nos puntonan debil pa asina nan por dedica atencion adicional na esaki pa logra drecha esakinan na e manera mas eficiente y productivo.

   E turista cu ta bin Aruba, sin mas ta goza di sea, solo y santo blanco cu ta asina palpable, pero e otro aspectonan no tangible cu nan ta goza di dj’e, hopi biaha nan no ta realisa mes cu nos profesionalnan a traha cu alma y cuerpo pa haci cu nan vacacion ta bay suave sin ningun tipo di problema. E producto cu Aruba ta ofrece ta resultado di un labor di amor; un sinergia constante y continuo di tur e actornan cu tin e producto Aruba na pecho.

   “Si bo a busca cu e palabranan Tourism Product Enhancement Fund, lo bo a ripara di biaha cu otro paisnan tambe tin un fondo parecido na nos TPEF. Entre otro Jamaica Australia y  Singapore tambe. Kico esaki ta bisa nos di nos TPEF? E ta bisa nos cu nos ta riba bon caminda y cu paisnan cu ta balora nan industria turistico tin un fondo pa mehoracion di nan producto turistico. E ta bisa nos cu nos ta den bon compania y den compania di paisnan cu ta serio en cuanto di nan vision pa nan turismo.

   Na tur esnan cu a haci y ta haci e trabao importante aki, mi kier expresa mi palabranan di gratitud. Ta keda mi na implora boso tur pa keda semper cu e amor pa boso trabao. No solamente pasobra e turista ta goza di un estadia maraviyoso sino pasobra pa cada un di boso e ta motibo pa orguyosamente wak rond y sinti den profundo di bo alma y curazon cu abo ta parti di esey. Un biaha mas danki na e TPEF board y na Minister Oduber pa bo guia y vision”, Prome Minister Evelyn Wever-Croes a expresa.