Gobierno a manda palabra di profundo condolencia na Haiti

ORANJESTAD (AAN): Den nomber di Gobierno di Aruba y e pueblo di Aruba, Prome Minister Evelyn Wever-Croes, pa medio di e consul di Haiti na Aruba, su Honorabel Señora Fredliette Bernard-Trajean,

a manda palabranan di profundo condolencia na Haiti y na señora Moise na ocacion di e asesinato di Presidente H.E.Mr. Jovenel Moise.

            Presidente Moise a tuma oficina presidencial na Februari 2017 y diaranson el a wordo asesina den su cas.

            Despues di a ricibi e carta di Prome Minister expresando profundo condolencia na pueblo di Haiti, na e esposa di Presidente Moise y na e haitianonan cu ta residencia na Aruba, e Consul general di Haiti a manda un carta di gradicimento na Prome Minister indicando cu el a transmiti e palabranan di simpatia y condolencia na autoridadnan na Port-au-Prince kendenan a tuma nota di e reaccion lihe di Gobierno di Aruba y a gradici Prome Minister pa esaki.

            “E noticia tragico aki a shock profundamente Gobierno y e comunidad di Aruba. Nos ta spera cu e responsabelnan pa e acto horendo aki pronto wordo treci dilanti di husticia y cu paz y stabilidad politico reina bek na Haiti”, Prome Minister Evelyn Wever-Croes a expresa.