Djis pasobra publico tabata grita ‘Leo Messi’...
RIYAD: Hopi ciudadano di Arabia Saudita a pidi riba social media, pa gobierno di e pais ‘deporta’ Cristiano Ronaldo di e pais. Esaki ta despues cu e astro portugues a gara cu su mannan e parti priva, ora el a tende fanaticonan ta canta y grita e nomber di Leo Messi, na final di e wega cu su team Al Nassr a hunga na Al Hilal.
E abogado Nouf bin Ahmed a bisa cu nan lo presenta un denuncia na Ministerio Publico contra e futbolista portugues, y acuse di comete ‘un delito di indecencia publico’.
“E ta wordo considera un delito y falta di respet pa publico, y ta un di e delitonan pa cual bo por wordo aresta y si ta un stranhero, e tin di wordo deporta,” ta loke e abogado specialista den Derecho Internacional, y cu a mustra cu tin un video tambe graba di e atleta ta haci e acto inmoral aki.
Loke Cristiano a haci pa colmo a wordo discuti basta largo den e programa ‘Action ya Dawri’, cu ta e programa deportivo mas popular di Arabia Saudita.
Segun fuentenan di e team Al Nassr cu a wordo puntra riba e actitud di Cristiano, el a bin cu e excusa cu e atleta a haci esey pasobra ‘el a ricibi un golpi durante e wega’ na su parti delicado.
Otro periodistanan di deporte na Arabia Saudita tabata mas critico aun, manera Ozman Abu Bakr, kende a bisa cu loke Cristiano a haci riba veld ta ‘un gesto inmoral y mal educa contra fanaticonan”, y a bisa cu Federacion di Futbol di Arabia Saudita mester kibra e contract di Ronaldo.
E polemica a presenta den e wega entre Al Nassr (pa cual Ronaldo ta hunga), y e team Al Hilal, kende supuestamente a presenta un oferta multi-miyonario pa por haya Leo Messi hunga pa nan e siguiente season.
Al Hilal a gana e wega cu score di 2-0 via di penalty di e veterano delantero Odion Ighalo di Nigeria.
