Gobierno a honra baluarte Chonai Faro

Durante ‘Fiesta Tipico den Bario’ na Centro di Bario Noord:

ORANJESTAD (AAN): Den fin di siman cu a pasa, a tuma luga e di shete ‘Fiesta Tipico den Bario', organiza pa Fundacion Union di Tipiconan Rubiano. Un iniciativa cu cada bes ta bira mas grandi y cu Minister Xiomara Maduro ta sostene y apoya, pasobra hunto nos tin cu sigui promove y biba nos cultura. Nos mester yuda mantene nos musica Tipico y nos folklore bibo den tur nos barionan y pa e por keda biba pa nos generacionnan nos dilanti. Gobierno di Aruba ta gradici UNOCA pa pone fondonan disponibel pa yuda cubri gastonan pa por organiza e fiesta tipico cultural.  

   E Fiesta Tipico den Bario, ta un momento special tambe caminda den nomber di Gobierno  di Aruba, Minister Maduro di Cultura ta haci uzo di oportunidad pa brinda reconocimento na esnan cu ta sostene, promove y mantene nos folklor bibo den nos barionan. Diadomingo ultimo a toca turno na Noord y Minister di Cultura a reconoce dos Baluarte Cultural di e distrito pa nan contribucion di yuda mantene y promove nos cultura musical.

    Chonai Faro: E prome persona cu a ricibi un reconocimento tabata Sr. Isnardo Epifanio Faro (Chonai). Chonai, manera tur hende conoce, a nace dia 22 di maart 1945 y ta di e bario di Sabana Liber. Dia 17 di april di e aña aki el a cumpli 50 aña casa cu Señora Petra Faro de Cuba, cual matrimonio a haya 2 yiu homber (Jorge y Junior), 4 nieta, 5 nieto y 1 bisanieto.

   Den su discurso e mandatario a elabora riba e trayectoria amplio di Chonai kende pa 35 aña a sirbi como maestro di scol. Ademas Chonai tin mas di 55 aña como miembro fiel y e ta indiscutiblemente esun cu mas aña como miembro continuo di e prestigioso coro di Misa di Santa Anna. Desde cu Chonai a yega di su estudio for di Hulanda, el a dirigi e koor hunto cu defunto Zr. William riba su orgel. Semper el a keda e man drechi di e koor, caminda e ta zorg pa muziek, traha programa, traha cu e CD player y mixer pa e microphonenan y tambe dirigi e coro ora cu no tin dirigente. Ora tin misa special e ta zorg pa por tin tocadornan y hopi biaha Chonai ta yuda den bestuur y comision di actividad. Chonai tambe a participa den tur festival aki na Aruba y na Curaçao unda cu coro Santa Anna a bay canta.

   Banda di koor di misa di Noord, Chonai a yega di canta den varios coro na Aruba y e ta fundador y doño di basta agrupacion, di cual nos por menciona su popular banda musical ‘La Selecta’ den cual bastante musico y artistanan local y internacional a debuta. Chonai ta forma parti te ainda di Tipico Arco Iris, Tico y sus Estrellas, Patan Farro and Friends y tambe Tommy Figaroa and Friends. Pa e temporada di mas dushi di aña, semper bo ta haye den su gaita. el a cuminsa hopi aña pasa cu aguinaldo den Bicentenial di Noord, como tambe a forma parti di  Campanitas Navideñas, Gaiteros del Norte, Maruba y ultimo den Katatumbo. Chonai a yuda varios organizacion manera grupo Flor di Bini Bini, Festival di Voz y Landia Escolar, gruponan di baile, Miss Teenage y Comision di santana di Noord. Chonai en general nunca e ta bisa “NO” na nada cu ser pidi na dje y apesar di tur su ocupacion semper ta sobra tempo pa su famia. Banda di musica el a dirigi y hunga softbal tambe pa Paxton y Montaña Braves den tempo di Gloria na e veld di Montaña.

   Chonai awo ta disfrutando di su pension bon mereci, pero niun dia, e no por sinta keto. E stima bestia, mata y naturalesa pesey lo bo por mire den su cunucu ta planta diferente mata di fruta, boonchi, maishi y pampoena. Minister di Cultura Xiomara Maduro a entrega Sr. Isnardo Epifanio Faro den nomber di Gobierno di Aruba, un plakaat pa mas di 55 aña den su carera artistico como corista y musico.

   Gradicimento: Por ultimo Minister Maduro ta gradici un bes mas Sr. Chonai Faro pa su contribucion na mantene y promove nos cultura. Ademas ta gradici Fundacion Union di Tipiconan Rubiano, pa organiza Fiesta Tipico den Bario y asina sigui mantene nos cultura di musica tipico bibo pa asina nos por disfruta di dje den nos barionan hunto cu famia y conocirnan. Danki na tur grupo Tipico, tur musico y cantante pa nan presentacion den  Fiestanan Tipico den Bario, como tambe tur esnan cu ta presencia pa apoya loke ta di nos Aruba, nos cultura, pasobra “Cultura Bo tin cu Bib’e!”