ORANJESTAD (AAN): Na 2019 biblioteca a lansa su plataforma digital cu un coleccion chikito. Un coleccion cu a sigui crece, bira grandi. Semper a busca conseho pa wak con por amplia e plataforma y percura pa e por sigui expande.
Na dado momento a busca colaboracion cu 11 otro instancia na Aruba cu ta warda informacion historico, informacion cu ta forma parti di e herencia cultural di Aruba. E colaboracion a resulta den un coleccion mas grandi y un coleccion hopi mas diverso, rico y varia. Coleccion Aruba ta un solo portal pa e herencia documental y audiovisual di Aruba.
E portal ta accesibel algun tempo caba pero dia 28 di september a lansa esaki oficial den un ambiente festivo. Den medionan di comunicacion a lansa e coleccion tan balioso aki www.coleccion.aw.
E coleccion ta ofrece mas cu 80.000 mil items al momento y por explora historia y cultura di Aruba. E coleccion digital ta ofrece acceso liber na bishitante en busca di informacion, studiante y investigadornan. E meta ta pa duna acceso na un y tur.
Cu e coleccion digital un parti di e coleccion nacional documental y audiovisual di Aruba ta mas visibel pa mundo henter. Ta posibel pa accesa e portal via e Homepage di Biblioteca Nacional.
E proyecto ta bou maneho di sr. Peter Scholing. Pa pregunta, pa manda publicacion digital of pa mas informacion por tuma contacto via email: This email address is being protected from spambots. You need JavaScript enabled to view it.
